Layamon's Brut (British Museum Ms. Cotton Caligula A.IX)
Layamon

Lines 13701 through 13800

Ma þer aqueðen; of Arðures iueren.
     13701
þene sixti þusende; segges mid horne.
     13702
þa wolcne gon to dunien; þa eo[r]ðe gon to biuien.
     13703
To-somne heo heolden; swulc heouene wolde uallen.
     13704
ærst heo lette fleon to; feond-liche swiðe.
     13705
flan al swa þicke; swa þe snau adun ualleð.
     13706
stanes heo letten seoððen; sturnliche winden.
     13707
seoððen speren chrakeden; sceldes brastleden.
     13708
helmes to-helden; heȝe men uellen.
     13709
burnen to-breken; blod ut ȝeoten.
     13710
ueldes falewe wurðen; feollen here-mærken.
     13711
Wondrede ȝeond þat wald; iwundede cnihtes ouer-al.
     13712
sixti hundred þar weoren; to-tredene mid horsen.
     13713
beornes þer swelten; blodes at-urnen.
     13714
stræhten after stretes; blodie stremes.
     13715
balu wes on uolke; þe burst wes vnimete.
     13716
Swa al swa suggeð writen; þæ witeȝen idihten.
     13717
þat wes þat þridde mæste uiht; þe auere wes here idiht.
     13718
þeo at þan laste; nuste nan kempe.
     13719
whæm he sculde slæn on; and wham he sculde sparien.
     13720
for no icneou na man oðer þere; for vnimete blode. Page  720
     13721
Þa hæf þat fiht of þan studen; þer heo ær fuhten.
     13722
and bigunnen arumðe; ræsen to-somne.
     13723
and neouwe ueht bi-gunnen; narewe iþrungen.
     13724
þer weoren Romleoden; reouliche iladde.
     13725
Þa comen þer kinges þreo; of hæðene londe.
     13726
of Ethi[o]pe wes þe an; þe oðer wes an Aufrican.
     13727
þe þridde wes of Libie; of hæðene leode.
     13728
Heo comen to þere uerde; a þere æst ænde.
     13729
& þene sceld-trume breken; þe Bruttes þer heolden.
     13730
and anan fælden; fiftene hundred.
     13731
baldere þeinen; of Arðures. þeoden.
     13732
þa wenden Bruttes; sone to þa rugges.
     13733
Þa comen þer riden; tweien eorles kene.
     13734
þat was Beduer and Kæi; Arðures birle and his mæi.
     13735
heore Bruttes heo isehȝen; mid bronden to-hawen.
     13736
Þer iwurðen to-bursten; eorles swiðe balden.
     13737
mid ten þusend cnihten; hælden to þan uihten;
     13738
amidden þan þrunge; þer heo þihkest weoren.
     13739
and sloȝen Rom-leoden; reouliche swiðen.
     13740
& ȝeond þan uehte wenden; after heore iwillen.
     13741
Þa weoren heo to þriste; and to ufele heom biwusten.
     13742
wala wa wala wa; þat heo neoren war þa.
     13743
þat heo ne cuðen bi-witen heom; wið heore wiðer-iwinnen.
     13744
for heo weoren to kene; & to ær-wene.
     13745
and to swiðe fuhten; and to ueor wenden.
     13746
and spradden to wide; ȝeond þat feht brade.
     13747
Þa com þe king of Mede; þe muchele & þe brade.
     13748
heðene here-þrihng; þer he hærm wrohte.
     13749
he ladde to iueren; twenti þusend rideren.
     13750
he heold on his honde; ænne gare swiðe stronge.
     13751
Þene gare he uorð strahte; mid strongen his maine.
     13752
and smat þene eorl Beduer; forn a þan breoste;
     13753
þat þa burne to-barst sone; biuoren and bihinde.
     13754
an-opened wes his breoste; þa blod com forð luke.
     13755
Þer feol Beduer anan; de[d] uppen uolden.
     13756
þer wes sarinesse; sorreȝen inoȝe.
     13757
Þer Kai funde Beduer; ded liggen him þer. Page  722
     13758
& Kai þat lich wolde; leden mid him-seolue.
     13759
mid twenti hundred cnihten; he hælde þer a-buten.
     13760
and feondliche feuhten; & falden Rom-leoden.
     13761
& of Medie þer sloȝen; moni hundred monnen;
     13762
þat ueht wes strong swiðe; and heo weoren þer to longe.
     13763
Þa com þer liðen; a swiðe ladlic king an.
     13764
mid sixti þusend monnen; sele of his londen.
     13765
Setor þe kene. þe com him from Libie.
     13766
Þer þe king stronge; wi[ð] Kæi him gon fehte.
     13767
and for-wundede Kai swiðe; inne strongen þan fehte.
     13768
to þan bare deðe; reou-lich wes þa dede.
     13769
His cnihtes þer-rihte; hine ladden of þan uihte.
     13770
mid muchelere strengðe; þurh þat feht stræhten.
     13771
Wa wes Arðure kinge; for þa tidinge.
     13772
Þæt iseh þe riche þein; Ridwaðelan wes ihaten.
     13773
Beduer%res suster sune; of heȝe Bruttes he wes icume.
     13774
þat Boccus mid his spere stronge; Bedver hafde istunge.
     13775
Wa wæs him on liue; þa his æm wes an deðe.
     13776
for he of alle monnen; mæst hine lufede.
     13777
He cleopede of his cunne; cnihtes swiðe gode.
     13778
& of þan alre leofeste; þe he on liue wuste.
     13779
fif hundred bi tale; fusden to-somne.
     13780
Riwað%ðlan þa sæide; riche mon of Brut%tene.
     13781
Cnihtes ȝe beoð of mine cunne; cumeð hidere to me;
     13782
and wreke we Beduer min æm; þa bezst wes of ure cunne.
     13783
þa Buccus hafd of-stungen; mid his spere strongen.
     13784
Fuse we alle to-somne; & ure i-fan feollen;
     13785
Æfne þan worde; forð he iwende;
     13786
and alle mid him anan; aðele his i-ueren.
     13787
and Buccus þene king icneowen; þer he was i compen.
     13788
mid his spere and mid his scelde; monine king he aqu[a]lde.
     13789
Riwadðlan braid ut his sweord sone; and him to sweinde;
     13790
and smat þane king a þene helm; þat he a twa to-ueol.
     13791
and æc þere burne hod; þat hit at þe toðen at-stod.
     13792
and þe heðene king; hælde to grunde.
     13793
& his fule saule sæh in-to helle.
     13794
Riwærdðlan þa seide; ræh he was on mode. Page  724
     13795
Boccus nu þu hafst aboht; Beduer þu sloȝe.
     13796
and þi saule scal to-ȝere; beon þas wurse iuere.
     13797
Æfne þan worde; swulc hit þe wind weore.
     13798
he þraste to þan fihte; swa þode doð on felde.
     13799
þenne he þat dust heȝe; aȝiueð from þere eorðe.
     13800