Layamon's Brut (British Museum Ms. Cotton Caligula A.IX)
Layamon

Lines 13001 through 13100

and wende mid þan dunten; Arður al to-driuen.
     13001
ah Arður bræid heȝe; his sceld buuen his hælme.
     13002
and þe eotend smat þer-an-ouenan; þat al he gon to-scenen;
     13003
And Arður him swende to; an hiȝende mid his sweorde.
     13004
and þen chin him of-swipte; mid alle þan cheuele.
     13005
and sturte him biaften ane treo; þe þer stod aneouste.
     13006
and þe eotend smat after biliue; & noht hine ne hutte.
     13007
ah he þat treo smat; þat al his clubbe to-draf.
     13008
And Arður aneouste; þat treo bieorn abute.
     13009
and swa Arður & þe scucke; biurnen hit þreie a-buten.
     13010
Þa wes þe eotend heui swiðe. and Ar[ð]ur wes swiftre;
     13011
& of-toc þene eotend. and up ahof his gode brond;
     13012
and þat þih him of-smat; & eotend adun wæt.
     13013
And Arður at-stod and biheold. þa gon to spekene þe ueond.
     13014
Lauerd lauerd ȝef me grið; wha is þat me fihteð wið.
     13015
Ne wende ich þat na man; a þissere weorlde-richen.
     13016
me mihte þus lehtliche; a-leggen mid fehte.
     13017
bute hit Arður weore; aðelest alre Brutte. Page  682
     13018
and neoðeles næs ich nauere; of Ar[ð]ure a-færed sære.
     13019
Þa him sæide Ar[ð]ur; aðelest kingen.
     13020
Ich æm Arður þe king; Bruttene deorling.
     13021
Tel me of þine cunne; and whar beo heore beonste.
     13022
and wha þe weore on uolde; fader oðer moder. ihalde.
     13023
and of wulche londe; þu art iliðen hidere.
     13024
and whi þu mine maȝe; a-ualled hafuest mid morðe.
     13025
Þa andswarede þe feond; þer he læi and biheold.
     13026
Al þis ich wulle don; and þine treoðe under-fon.
     13027
wið þat þu me lete liuien; and mine leomen hælen.
     13028
Arður hine iwræððede; wunder ane swiðe.
     13029
and he Beduer cleopede; balde his kempe.
     13030
Ga aneouste Beduer; and hefd him binim her.
     13031
& fere hit forð mid þe; adun of þisse munte.
     13032
Beduer aneouste com; & his hæfued him binom
     13033
& swa heo þeone((ne)) ferden. adun to heore iferen.
     13034
[Þa sat þe king adun] and hine gon to resten.
     13035
and þas word seide; Arður þe sele.
     13036
No uæht ich nauere [u]eh[t] non; uppen þissere uolden.
     13037
buten þa ich sloh þene king Riun; uppen þan munte of Rauinite.
     13038
Seoððen heo uorð wenden; & to þere uerde comen.
     13039
þa þe þat hafd iseȝe; sellic heom þuhte.
     13040
whar weore under heuene; swulc hafed ikenned.
     13041
Howel of Brutaine; beh to þan kinge.
     13042
and þe king him seide; al of þan maidene.
     13043
Þa wes Howel sari; & sorhful an heorte for-þi.
     13044
and nom al his feren; and ferde to þan munte.
     13045
þer þat Brutisce maide; bibured læi on eorðe.
     13046
He lette þer areren sone; ane chireche swiðe faire.
     13047
a Seinte Marie nomen; Drihtenes moder.
     13048
& seoððen he ȝæf nome þan hulle; ær he þonne wende.
     13049
and hehte hine Æleine Tunbel; nu hit hæhte Munt Seint Myhhel.
     13050
Þa wes Arðures hired; sellich isomned.
     13051
of Irlonde & of Scotlonde; þider weoren iscriðene.
     13052
Þa lette þe king blauwen; bemen an hireden.
     13053
& wenden of Brutaine; bisie men & kene.
     13054
þurh-ut Normandie; þæ hehte þa Neustrie. Page  684
     13055
heo uerden þurh-ut France; and folc heom after ferde.
     13056
heo buȝen ut of Fra[n]ce; into Burguine.
     13057
His hauwæres þer comen; and heolden his iferen.
     13058
& cudde þan kinge; þer i þare cuððe.
     13059
þat Luces þe kaisere; and al his Romanisce here.
     13060
þider-ward heo comen; fromward heore þeoden;
     13061
& swa heo wolden fusen; in touw%ward France.
     13062
and al þat bi-winnen; and seoððen wenden hidere.
     13063
& Bruttes alle aquellen; quicke þer heo heom funde.
     13064
and Arður þene kene; ibunde lede to Rome.
     13065
Þa wes abolȝen; baldest alre kingen.
     13066
and hehte a þan feldes; slen alle his teldes.
     13067
and þer he wikien wolde; þat he þat soðe wuste.
     13068
whær he minte þene kæisere; iwisliche kepen.
     13069
Þat wate((r)) hehte Albe; þer lai þe king balde.
     13070
An wis cniht þer com ride; to þas kinges uerde.
     13071
þe wes al for-wunded; & his folc afelled swiðe.
     13072
hafden Romanisce men; al his lond bi-ræiued him.
     13073
He talde þan kinge; neouwe tiðende.
     13074
whar lai þe kaisere; and al his Romanisce here.
     13075
& whær he hine mihte iwinde; ȝif he hine wolde wi[ð] him fihten.
     13076
oðer grið makien; wið Romanisce monnen.
     13077
Ah lauerd Arður quað þe cniht; ich þe wulle cuðen her-riht.
     13078
þat betere þe is freondscipe to habben; þene for to fihten.
     13079
for aȝan þine tweie; heo habbeoð twælue.
     13080
swa feole kinges; swa feole here-dringes.
     13081
Nis he in nare kuððe; þe hit þe maȝe icu[ð]ðe.
     13082
for alle þan uolke; þe uulieð þan kinge.
     13083
wið-uten þan Rom-leoden; of his aȝere þeoden.
     13084
and wið-ute þan uolke; þe ȝirneð þas kinges are.
     13085
Þa þe talen weoren alle italde; & Arður heo hafden under-stonde.
     13086
þa cleopede þe king forð-rihtes; his deoreste cnihtes.
     13087
& radden heom bitwenen; enne castel to areren.
     13088
on-uast þan wateren; þe Albe wes ihaten.
     13089
On ane swiðe feiere stude; itimbred he wes ful sone.
     13090
þer feng moni hond to; an hiȝende he wes ido.
     13091
for ȝif Arður mis-ferde; þenne he come to fihte.
     13092
oðer his uolc ueolle; oðer setten to fleonne. Page  686
     13093
þenne þohte he to at-stonden; at þan castle stronge.
     13094
Þa cleopede he eorles tweie; aðele men and wise.
     13095
heȝe men icunned; þan kinge swiðe deore.
     13096
þæ an wes of Chartres; and hehte Gerin. muchel wisdom wunede mid him.
     13097
þe oðer hehte Beof ((of)) Oxene-uord; welle wide sprong þas eorles word.
     13098
Þe ȝet þe king cleopede Walwæin. þe wes his deoreste mæi.
     13099
for Walwain cuðe Romanisc; Walwain cuðe Bruttisc.
     13100