Layamon's Brut (British Museum Ms. Cotton Caligula A.IX)
Layamon

Lines 12801 through 12900

þe king his folc hehte; herberwe isechen.
     12801
an badien þe king wolde; þat his folc come;
     12802
Nes he þere buten ane niht; þa com him to an hende cniht.
     12803
he talde tidinge Arðure þan kinge.
     12804
he seide þat þer wes icumen; a scaðe liðe.
     12805
of westward Spaine; wel [d]reori feond
     12806
and inne Brutaine. bisi wes to harme;
     12807
bi þere sæ-side. þet lond he weste wide;
     12808
nu hit hatte Munt Seint Michel; þat lond ewelde. iwidel.
     12809
Lauerd king queð þe cniht; to soðe ich þe cuðe her-riht.
     12810
he hafueð inome þine maȝe; mid hahliche strenðe.
     12811
heȝe wimmon i-boren; Howeles dohter icoren.
     12812
Eleine wes ihaten; aðelest maidenen.
     12813
To þan munte he heo uerede; aðelest maidene;
     12814
nu fulle feowertene niht; þe feond heo hafueð ihalden þer-riht.
     12815
nute we on liue; þeh he heo nabbe to wife.
     12816
Alle he makeð him to mete; þa men þa he i-gripeð.
     12817
ruðeren hors & þa scep; gæt and þa swin eke.
     12818
al þis lond he wule for-fare; buten þu afeollen ure kare.
     12819
lond and þas leode; a þe is ure neode.
     12820
Ȝet þe cniht seide; to þan uolc-kinge.
     12821
I-sihst þu lauerd þe munt; and þene wude muchele.
     12822
þer wuneð þe scaðe inne þa scendeð þas leode.
     12823
We habbeð wið him iuohten; wel feole siðen.
     12824
bi sæ & bi londe; þes leoden he amærde.
     12825
ure scipen he aseingde; þat folc he al adrente.
     12826
þeo þat feuhten a þan londe; þeo he adun leide.
     12827
we habbeoð idriuen þat swa longe; þat we hine læteð ane.
     12828
faren heu swa he wule; after iwille him;
     12829
þis lond-cnihtes ne durren; wið him mare na fehten.
     12830
Arður þis iherde; aðelest alre kinge. Page  672
     12831
he cleopede him to. þene eorl Kæi; þe wes his stiward and his mæi.
     12832
Beduer eke; to him he cleopede. he wes þes kinges birle.
     12833
He hæhte heom forð-riht; beon al war to midder-niht.
     12834
mid alle heore wepne; to wenden wið þan kinge.
     12835
þat na mon under Criste; of heore uare nuste.
     12836
buten Arður þe king; and þa tweien cnihtes mid him.
     12837
and heore sweines sixe ohte men and wihte.
     12838
and þe cniht þe radde; hit þan king. heom ladde.
     12839
To þere mid-nihte; þa men weoren aslepe.
     12840
Arður forð him wende; aðelest alre kinge.
     12841
Bi-foren rad heore lo[n]d-cniht; þat hit was dæiliht;
     12842
heo lihten of heore steden; and rihten heore i-weden.
     12843
Þa iseȝen heo nawiht feorren; a muchel fur smokien.
     12844
uppen ane hulle; mid sæ-ulode bi-uallen.
     12845
and an-oðer hul þer wes swiðe heh; þæ sæ hine bifledde. ful neh.
     12846
þer-uuen-on heo iseȝen a fur; þat wes muchel and swiðe stor.
     12847
Þæ cnihtes þa tweoneden; to whaþere heo faren mihten.
     12848
þet þe eotend war neore; of þeos kinges fore.
     12849
Þa nom him to rede; Arður þe ræȝe.
     12850
þat heo sculden somed faren; aneosten þan ane furen.
     12851
and ȝif hine þer funden; a-quellen hine to deðen.
     12852
Forð þe king wende; þat he com aneuste.
     12853
noht he þer ne funde. bute a muchel fur þer berninde.
     12854
Arður eode abute; & his cnihtes bi his siden.
     12855
na whit heo ne funden; quikes uppen wolden.
     12856
buten þat fur muchele; and ban vnimete.
     12857
bi atlinge heom þuhte; þritti uoðere.
     12858
Arður þa nuste. nenne red godne
     12859
& bi-gon him to spekene. to Beduer his eorle.
     12860
Beduer far biliue; a-dun of þissen hulle.
     12861
and wend þe ouer þat water deope; mid allen þine iwede;
     12862
and mid wisdome; wend to þan fure.
     12863
and bi-halues þe iga; and bi-hald ȝeorne.
     12864
ȝif þu miht a-finden; oht of þan feonden.
     12865
And ȝif þu hine miht of-ȝiten; on aiȝes cunnes wisen.
     12866
wend adun stille; þat cume to þan watere.
     12867
& seien me þer sone; what þu i-seȝen habbe.
     12868
and ȝif hit ilimpeð swa; þat þu liðen to þan fure. Page  674
     12869
& þe feond þe of-ȝite; and þu to fuse.
     12870
hafe mine godne horn; þe al mid golde is ibon.
     12871
and blawe hine mid maine; swa mon scal for neode.
     12872
and fus þe to þan feonde; and bigin to fihten.
     12873
& we þe scullen fusen to; swa we hit swiðest maȝen don.
     12874
And ȝif þu hine i-findest; aneouste þan fure;
     12875
and þu al un-aȝeten aȝein miht iwende.
     12876
þenne for-beode ich þe; bi þine bare life.
     12877
þat þu nauere wið þene scucke; feht no biginne.
     12878
Beduer iherde; what his lauerd him seide.
     12879
his wepnen he on him dude; and forð him iwende.
     12880
and up a-stæh þene munt; þe is uni-mete.
     12881
He bar an his honde; ænne gære swiðe stronge.
     12882
ænne sceld an his rugge; i-rust al mid golde.
     12883
hælm an his hafde; hehne of stele.
     12884
his bodi wes bifeong; mid fæire are burne.
     12885
he hafde bi his side; enne brond al of stele.
     12886
and forð he gon steppen; stið imainede eorl.
     12887
þat he com fusen; an neouste þan furen.
     12888
and he under ane treo; gon him at-stonden.
     12889
Þa iherde he wepen; wunder ane swiðen.
     12890
wepen and weinen; and wanliche iberen.
     12891
Þa þe cniht wende; þat hit þe eotend weoren.
     12892
and he an-bursten agon; swulc weore a wilde bar.
     12893
and forȝæt sone; þat his lauerd him sæide.
     12894
His sceld he bræid on breoste; his spere he igrap faste.
     12895
and an neoste gon fuse; touward þan fure.
     12896
he wende to finden; þene feond sturne.
     12897
þat he fehten mihte; and fondien hine seolue.
     12898
Þa fond he þer ane quene; quecchen mid hafde.
     12899
heor-lockede wif; weop for hire wei-sið.
     12900