Layamon's Brut (British Museum Ms. Cotton Caligula A.IX)
Layamon

Lines 12301 through 12400

For heo hafden on iqueðen alle; bi heore quike liue. Page  644
     12301
þat heo wolden of ane heowen; heore claðes habben.
     12302
Sum hafde whit sum hafden ræd; sum hafde god grene æc.
     12303
and alches cunnes fah clað; heom wes wunder ane lað.
     12304
& elche untuhtle; heo talden vn-wurðe.
     12305
Þa hafde Ænglene ard; þat alre bezste here-word.
     12306
and þis leodisce uolc æc; leofuest þan kinge.
     12307
Þa wifmen hehȝe iborene; þa wuneden a þissen londe.
     12308
hafden iqueðen alle; on heore quides soðe.
     12309
þat nan lauerd taken nolde; inne þissere leode.
     12310
næuer nænne cniht; neore he noht swa wel idiht.
     12311
bute he icostned weoren; þrie inne compe.
     12312
& his oht-scipen icudde; & i-fonded hine seolue.
     12313
balde-liche he mitte þenne ȝirnen him brude.
     12314
For þere ilke tuhtle; cnihtes weoren ohte.
     12315
þa wif-men wel idone; and þa betere biwitene.
     12316
þa weoren i Brutene; blissen inoȝe;
     12317
Þa þe king iȝeten hafde. and al his mon-weorede.
     12318
þa buȝen of burhȝe; þeines swiðe balde.
     12319
alle þa kinges; and heore hereþringes;
     12320
alle þa biscopes; and alle þa clærckes.
     12321
alle þa eorles; and alle þa beornes.
     12322
alle þa þeines; alle þa sweines;
     12323
feire iscrudde; helde ȝeond felde.
     12324
Summe heo gunnen ærnen; summe heo gunnen urnen.
     12325
summe heo gunnen lepen; summe heo gunnen sceoten.
     12326
summe heo wræstleden; and wiðer-gome makeden.
     12327
summe heo on uelde; pleouweden vnder scelde.
     12328
summe heo driuen balles; wide ȝeond þa feldes.
     12329
Monianes kunnes gomen; þer heo gunnen driuen.
     12330
& wha-swa mihte iwinne; wurðsciþe of his gomene.
     12331
hine me ladde mid songe; at-foren þan leod-kinge.
     12332
and þe king for his gomene; ȝæf him ȝeuen gode.
     12333
Alle þa quene; þe icumen weoren þere.
     12334
and alle þa lafdies; leoneden ȝeond walles.
     12335
to bihalden þa duȝeðen; and þat folc plæie.
     12336
Þis ilæste þreo dæȝes; swulc gomes & swulc plæȝes.
     12337
Þa a þan ueorðe dæie; þe king gon to spekene.
     12338
and aȝæf his gode cnihten; al heore rihten.
     12339
he ȝef seoluer he ȝæf gold; he ȝef hors he ȝef lond.
     12340
castles & claðes eke; his monnen he ique[m]de. Page  646
     12341
þer wes moni bald Brut; biuoren Arðure.
     12342
Nu comen to þan kinge; neouwe tidinde.
     12343
Arður þe ba[l]de king; sat at ane borde.
     12344
biuoren him seten kinges; and feole here-ðringes.
     12345
biscopes and clærekes; and swiðe ohte cnihtes.
     12346
Þer comen in-to halle; spelles seol-cuðe.
     12347
þer comen twalf þeines ohte; mid palle bi-þehte.
     12348
hæȝe here-kempen; hehȝe men on wepne.
     12349
ælc hafde on heonde; grætne ring of golde.
     12350
and mid æne bende of golde; ælc hafde his hæfd biuonge.
     12351
Æuer tweie and tweie; tuhte to-somne.
     12352
ælc mid his honde; heold his iuere.
     12353
and gliden ouer ulore; biuoren Arðure.
     12354
swa longe þat heo comen; bi-uoren Arðure. þan leod-kinge.
     12355
Heo grætten Arður anan; mid aðelen heore worden.
     12356
Hal seo þu Arður king; Bruttene deorling.
     12357
and hal seo þi duȝeðe; and al þi driht-liche uolc.
     12358
We sunden twælf cnihtes; i-cumen her forð-rihtes.
     12359
riche and wel idone; we sundeð of Rome
     12360
Hider we sunden. icumene; from ure kaisere.
     12361
Luces is ihaten; þe waldoð Rome-leoden.
     12362
he hahte us hider wende; to Arðure þan kinge.
     12363
and þe hat græten; mid his grim worden.
     12364
& sæið þat he awundred is; wunder ane swiðe.
     12365
whar þu þat mod nime; a þisse middenerde.
     12366
þat þu derst of Rome; wið-suggen æi dome.
     12367
oðer hebben up þin eȝen; aȝein ure ældren.
     12368
and wha hit þe durre ræden; þat þu swa reh ært. iwurðen.
     12369
þat þu þrattien darst; domes walden.
     12370
Luces þene kaisere. hexst of quicke monnen.
     12371
Þu haldest al þi kine-lond; a þire aȝere hond.
     12372
and nult noht þene kaisere; of londe ihere.
     12373
of þan ilke londe; þe Iulius hafde an honde.
     12374
þa inne iuurn daȝæn; biwon hit mid fehten.
     12375
and þu hit hauest at-holde; a þire an-wolde.
     12376
mid balden þine cnihten; binimest us ure irihten.
     12377
Ah sæi us Arður sone; and word send to Rome.
     12378
we sculleð bere þin ærde; to Luces ure kaisere.
     12379
ȝif þu wult icnawen; þat he is king ouer þe. Page  648
     12380
and þu his mon bicumen wulle; and hine for lauerd icnawen.
     12381
and don riht þan kaisere; of Frolle þan kinge.
     12382
þat þu mid woȝe; at Paris a-sloȝe.
     12383
& nu haldest al his lond; mid unrihte a þire hond.
     12384
Ȝif þu i þissen twælf wiken; temest to þan rihten.
     12385
and þu wult of Rome; þolien æi dome.
     12386
þenne miht þu libben; imong þine leoden.
     12387
And ȝif þu swa nult don; þu scalt wursen vnder-fon.
     12388
þe kaisere wule her cumen; swa king scal to his aȝen.
     12389
king swiðe kene; and nimen þe mid strengðe.
     12390
ibunden þe lede; biuoren Rom-leoden.
     12391
þenne most þu þolien; þat þu ærst for-hoȝedest.
     12392
Æfne þisse worden; Bruttes buȝen from borden.
     12393
þer wes Ar[ð]ures hird; hehliche awraððed.
     12394
and muchene að sworen; uppen mære ure Drihten.
     12395
þat alle heo dede weoren; þa þeos arunde beden;
     12396
mid horsen al to-draȝene. dæð heo sculden þolie;
     12397
Þer heo buȝen to; Bruttes swiðe wraðe.
     12398
luken heom bi uaxe; and laiden heom to grunde.
     12399
þer weoren men Romanisce; reouliche atoȝene.
     12400