Layamon's Brut (British Museum Ms. Cotton Caligula A.IX)
Layamon

Lines 12001 through 12100

Arður nom his duȝeðe; and atwa heom to-dalde.
     12001
and þa haluendæle; Howele bitætte.
     12002
and hehte hine uaren sone; mid muchele þere uerde.
     12003
mid Brutisce monnen; londes iwinnen.
     12004
Howel dude al swa; alse Arður hine hehte.
     12005
he biwon Barri; and alle þa londes þer-bi. Page  628
     12006
Angou and Turuine; Aluerne and Gascunne.
     12007
and þa hafuenes alle; þe herden to þan londes.
     12008
Guitard þe duc hæhte; þe Peytouwe ahte.
     12009
he nolde buȝen Howele; ah heold to-ȝæines him æuere.
     12010
nolde he ȝirnen na grið; ah Howel him faht wið.
     12011
ofte he uolc ualde; and ofte he ulem makede.
     12012
Howel al þat lond weste; & of-sloh þa leode.
     12013
Þa isæh Guitard; þe i Peitou wes lauerd.
     12014
þat alle his leoden; him to lose eoden.
     12015
wið Howele he grið makede; mid al his mon-weorede.
     12016
and bicom Arðures mon; þas aðele kingen;
     12017
Arður him warð liðe; and luuede hine swiðe.
     12018
& hehte hine his; lond bruken; for he him bæh to foten.
     12019
þa hafde Howel; hæhliche agunnen.
     12020
Arður hafde France; and freoliche heo sette.
     12021
he nom þa his ferde; and wende ȝeond þan ærde.
     12022
to Burguine he wende; and sette hit an his honde.
     12023
and seo[ð]ðen he gon liðen; in-to Loherne.
     12024
and alle þa londes; sette him-seolue an honde.
     12025
al þat Arður isæh; al hit him to bæh.
     12026
and seoððen he wende ful iwis; aȝain ham to Paris.
     12027
Þa hafde Arður France; mid gode griðe astalde.
     12028
i-set and isemed; þat sel was an þeoden.
     12029
þa hehte he þa cnihtes alden; þa he hafde ȝare at-halden.
     12030
þat heo to þan kinge comen; and heore læn a-fængen.
     12031
for heo feole ȝeren; hafden i-bon his iueren.
     12032
Summen he ȝæf lond; summen seoluer and gold.
     12033
summen he ȝæf castles; summen he ȝaf claðes;
     12034
hehte heom uaren an wunne; and beten heore sunnen.
     12035
for-bed heom to berne wap[n]en; for ælde heom eode ouenan.
     12036
and hehte heom luuien swiðe; Godd in þissen liue.
     12037
þat he an ende ful iwis; ȝefen heom his paradis.
     12038
þæt heo mosten bruken; blisse mid ænglen.
     12039
Alle þa cnihtes alde; foren to heore londe.
     12040
and þa ȝunge bilæfden; mid leouen; heore kingen.
     12041
Alle þa niȝen ȝere; Arður wuneden þere.
     12042
niȝen ȝere he heold France; freoliche on honde.
     12043
and seoððen na lengere; þat lond he ne walde. Page  630
     12044
Ah þa while þe þat kinelond; stod an Ar[ð]ures hond.
     12045
þinges seolcuðe; siȝen to þere þeode.
     12046
monienne mod-fulne mon; Arður make((de)) milde.
     12047
and monienne hehne mon; he helde to his foten.
     12048
Hit wes an ane Æst%tere; þat men hafden iuaste;
     12049
þat Arður ((an)) Æstere dæi hafde; his aðele men at-somne.
     12050
al þat hæhste mon-cun; þat herden in-to Francen.
     12051
& of alle þan londen; þe þider in læien.
     12052
Þer he ȝette his cnihten; alle heore irihten.
     12053
elc ane he ȝef æhte; alse he iærned hafde.
     12054
Þus him iquað Arður; aðelest kingen.
     12055
Kæi bisih þe hiderward; þu ært min haxte stiward.
     12056
her ich Angou ȝiue þe; for þire wel-dede.
     12057
and alle þa irihte; þe þide[r] in beoð idihte.
     12058
Cneole me to Beduer; þu art min hexte birle her.
     12059
þa while þa ich beo an liue; luuien ich þe wulle.
     12060
her ich ȝiue þe Neustrie; aneuste mire riche.
     12061
Þa hehte Neustrie; þat nu hatte Normandie.
     12062
Þe ilke tweien eorles weoren; Ar[ð]ures deore men.
     12063
at rede and at rune; an æuer-ælche tune.
     12064
Þa ȝet him seide Arður; aðelest kingen.
     12065
Wend þe hider Howel-din; þu ært mi mon and mi cun.
     12066
haue þu Bulune; and bruc his on wunne.
     12067
Cum%me ner Borel; þu art cniht wis and war.
     12068
her ich þene Mans þe; mid monscipe bitæche.
     12069
and bruc þu his on wunne; for þire wel-dede.
     12070
Þus Arður þe king delde; his driht-liche londes.
     12071
after heore iwurhte; for he heom þuhte wurðe.
     12072
Þa weoren bliðe spelles; in Arðures hallen.
     12073
þer wes harepinge and song; þe[r] weoren blissen imong.
     12074
Þa Æstre wes aȝonge; and Aueril eode of tune.
     12075
and þat gras was riue; and þat water wes liðe.
     12076
and men gunnen spilien; þat wes Mæi at tune.
     12077
Arður nom his folc feire; and to þere sæ uerde.
     12078
and lette bonien his scipen; wel mid þan bezsten.
     12079
& ferde to þissen londe; and up com at Londen.
     12080
up he com at Lundene; leoden to blissen. Page  632
     12081
Al hit wes bliðe; þat hine isæh mid eȝen.
     12082
sone heo gunnen singe; of Arðure þan kinge.
     12083
and of þere wurð-scipe muchele; þe he iwunne hafde.
     12084
Þer custe uader þene sune; and seide to him wel-cume.
     12085
dohter þa moder; broðer þene oðer.
     12086
suster custe suster; þa softere heom wes an heorten.
     12087
A monie hundred studen; stoden bi þan weie.
     12088
folc fraini[n]ge; of feole cunne þingen.
     12089
and cnihtes heom talden; of heore on-walden.
     12090
and heore ȝeolp makeden of muchele biȝeten.
     12091
Ne mihte na mon suggen; nære he na swa hende. mon.
     12092
of halue þan blissen; þa weoren mid þan Brutten.
     12093
Ælc ferde an his neode; ȝeond þas kine-þeode.
     12094
from burhȝe to burhȝe; mid blissen uniuoȝe.
     12095
and þus hit ane stu[n]de; stod a þan ilke.
     12096
blisse wes on Brutene; mid balde þan kinge.
     12097
Þa Æstre wes aȝeonge; and sumer com to londe.
     12098
þa nom Arður his red; wið r[i]che his monnen.
     12099
þat he wolde inne Karliun; bere his crune him on.
     12100