Layamon's Brut (British Museum Ms. Cotton Caligula A.IX)
Layamon

Lines 11501 through 11600

And ȝet him seide Marlin; mare þat wes to ((co))mene.
     11501
þat al þat he lokede on; to foten him sculde buȝen.
     11502
Þa ȝet him sæide Mærlin; a sellic þe wes mare.
     11503
þat sculde beon unimete care; of þas kinges forð-fare.
     11504
and of þas kinges ende; nulle hit na Brut ileue.
     11505
buten hit beon þe leste dæð; at þan muchele dome.
     11506
þenne ure Drihte; demeð alle uolke.
     11507
Ælles ne cunne we demen; of Arðures deðen.
     11508
for he seolf sæide; to sele his Brutten.
     11509
suð inne Cornwale; þer Walwain wes for-faren.
     11510
and him-seolf wes for-wunded; wunder ane swiðe. Page  602
     11511
þat he uaren wolde. into Aualune.
     11512
in-to þan æit-londe; to Argante þere hende.
     11513
for heo sculde mid haleweie; helen his wunden.
     11514
and þenne he weore al hal; he wolde sone. come heom.
     11515
Þis ilefde Bruttes; þet he wule cumen þus.
     11516
& lokieð a whenne; he cume to his londe.
     11517
swa he heom bihahte; ar he heonne wende.
     11518
Arður wes an weorlde; wis king and riche.
     11519
god mon and grið-ful; his gumen hine luueden.
     11520
Cnihtes he hafede prute; and græte on heore mode.
     11521
& speken to þan kinge; of seol%lichen þinge.
     11522
and þus þat hired cleopede; to heȝe þan kinge.
     11523
Lauerd Arður faren we; to Francene riche.
     11524
and iwinnen al þat lond; to þire aȝere hond.
     11525
flemen alle þa Freinscen. heore king feollen.
     11526
alle þa castles bonien; and setten heom to mid Brutten.
     11527
& rixlien a þere riche; mid rehȝere strengðe.
     11528
Þa andswarede Arður; aðelest kingen.
     11529
Eouwer wille ich wulle don; ah ær ich wulle to Norweien;
     11530
and ich wulle mid me leden; Lot minne oðem.
     11531
he is Wæl((way))nes fader; þa ich wel luuie.
     11532
For beoð icumen of Norweiȝe; niwe tidende.
     11533
þat Sichelin king þer is ded; his duȝeðen bileued.
     11534
& hæ hafeð al his kineriche; bi-queðe her Loððe.
     11535
For þe king is al bidæled; sune & eke dohteren.
     11536
and Lot is his suster sune; þe bet him scal iwurðe.
     11537
for ich hine wulle in Norwæȝe; neowe king makien.
     11538
and hine wæl lere; to witeȝen wel þa leoden.
     11539
And þenne ich þus habbe idon; ich wullen seoððen cumen ham.
     11540
and ȝarkien mine ferde; & faren into France.
     11541
and ȝif þe king me stont wið; and nulle ȝeornen mi grið.
     11542
ich hine wulle mid fehte; fallen to þan grunde.
     11543
Arður lette blawen; hornes and bemen.
     11544
and lette beoden to sæ; Bruttes swiðe balde.
     11545
Scipen he hæfde gode; bi þere sæ-flode.
     11546
fiftene hundred; fusden from londe.
     11547
and fluȝen after þere sæ; swulc heo fluht hafden.
     11548
& buhȝen in-to Norwæȝen; mid baldere strengðen.
     11549
Sone swa heo comen; hafne heo nomen. Page  604
     11550
mid muchelere strengðe; stepen a þa riche.
     11551
Arður senden; his sonde; wide ȝeond þan londe.
     11552
& hæhte heom cumen sone; and Lot habben to kinge.
     11553
& ȝif heo þat nolden; alle heom he wolde a-slan.
     11554
Þa nomen heore sonden; eorles Norenissce.
     11555
and senden to þan kingen; and hahten hine aȝain wenden;
     11556
& ȝif þu nult aȝæin faren; sorhȝen þu scalt habben & kare.
     11557
for longe bið auere; þat ne iwurð næuere.
     11558
þat we uncuðne mon; to kinge scullen hæbben.
     11559
For ȝif Sikelin is forð-faren; her beoð oðere icoren.
     11560
þe we maȝen bi vre iwille; hæbben to kinge.
     11561
& þis is þat soðe; nis þer nan oðer.
     11562
oðer far þe awæiward; and wend þe riht hamward.
     11563
oðer to-dæi a seoueniht; þu scalt habben græt fiht.
     11564
Þa eorles Norenissce. nomen heom to ræde;
     11565
þat king heo wolden habben; of seoluen heore cunden.
     11566
for al Sikelines quiden; sotscipe heo heolden.
     11567
And swa longe. swa beoð æuere; ne scal hit stonde næuere.
     11568
ah we scullen nimen Riculf; þe is swiðe riche eorl.
     11569
and hebben hine to kinge; þis is us iqueme.
     11570
and sumnen ure ferde; ȝeond al þissen ærde.
     11571
and faren to Arðure; & flem%men hine mid fehte.
     11572
& Lot we scullen fusen; and flemen of londen.
     11573
oðer we mid fehten; sculleð hine fallen.
     11574
Heo nome Riculfe; þene eorl of Norene.
     11575
and hefuen hine to kinge; þeh hit neore him noht icunde.
     11576
and sumneden uerde; ȝeond Nornisce ærde.
     11577
And Arður an his ende; ȝuond þat lond gon wende.
     11578
þat londe he þurh-arnde; burhȝes he uor-barnde.
     11579
æhte he nom inoh; muche moncun he þer of-sloh.
     11580
And Riculf him gon riden; toȝæines Arðure anan.
     11581
to-gædere heo fusden; and veht heo bigunnen.
     11582
Bruttes buȝen heom to; balu þer wes riue.
     11583
Luken vt of scaþe; sweordes longe.
     11584
hefden fluȝen a þene uelde; faluwede nebbes.
     11585
beorn aȝein beorne; scaft sette an breoste.
     11586
burnen þer breken; Bruttes bisie weoren.
     11587
brustleden sceldes; scalkes ueolen. Page  606
     11588
& swa al þene dæi-liht; i-laste þis muchele fiht;
     11589
ferden heo æst ferden heo west. þer Noreine wes þa wurse;
     11590
ferden heo suð ferden heo norð; þe Norrene þer feollen.
     11591
Bruttes weoren balde; þa Noreine heo a-qualden.
     11592
Noreinisce men þer feollen; fif and twenti þusend.
     11593
and Riculf king þer wes of-slaȝen; and idon of lif-dæȝen.
     11594
lutel þer eode to læue; of þan leod-folke.
     11595
wulc-swa hafuede þat wracche lif; ȝirde Arðures grið.
     11596
Ar[ð]ur bisæh a Lot; þe leof him wes swiðe.
     11597
and þus him c[l]eopien agon; Arður þe riche mon.
     11598
Lot wend hider to me; þu art mi wine deore.
     11599
Her ich þe biteche; al þas kineriche.
     11600