Layamon's Brut (British Museum Ms. Cotton Caligula A.IX)
Layamon

Lines 11401 through 11500

and swa ich wulle al for-don; þat cun þat he of com.
     11401
And ȝif ich auere-mare; seoððen ihere.
     11402
þat æi of mine hirede; of heȝe na of loȝe.
     11403
of þissen ilke slehte; æft sake are[re].
     11404
ne sculde him neoðer gon fore; gold ne na gærsume.
     11405
hæh hors no hære scrud; þat he ne sculde beon ded.
     11406
oðer mid horsen to-draȝen; þat is elches swiken laȝen.
     11407
Bringeð þene halidom; and ich wulle swerien þer-on.
     11408
swa ȝe scullen cnihtes; þe weoren at þissen fihte.
     11409
eorles & beornes; þat ȝe hit breken nulleð.
     11410
Ærst sweor Arður; aðelest kingen.
     11411
seoððen sworen eorles; seoððen sweoren beornes.
     11412
seoððen sweoren þeines; seoððen sweoren sweines.
     11413
þat heo nauere-mare; þe sake nulde arere.
     11414
Me nom alle þa dede; & to leirstowe heom. ladden.
     11415
Seoððen me bleou bemen; mid swiðe murie dremen.
     11416
weoren him leof weoren him læ[ð]; elc þer feng water & clæ[ð].
     11417
& seoððen adun seten; sæhte to borden.
     11418
al for Arðure æiȝe. aðelest kingen;
     11419
Birles þer þurngen; gleomen þer sungen.
     11420
harpen gunnen dremen; duȝeðe wes on selen.
     11421
Þus fulle seoueniht; wes þan hirede idiht.
     11422
Seoððen hit seið in þere tale; þe king ferde to Cornwale.
     11423
þer him com to anan; þat wæs a crafti weorc-mon.
     11424
and þene king imette; and feiere hine grætte.
     11425
Hail seo þu Arður; aðelest kinge.
     11426
Ich æm þin aȝe mon; moni lond ich habbe þurh-gan.
     11427
ich con of treo-wrekes; wunder feole craftes.
     11428
Ich iherde suggen; bi-ȝeonde sæ neowe tidende.
     11429
þat þine cnihtes; at þine borde gunnen fihte.
     11430
a midewinteres dæi; moni þer feollen.
     11431
for heore mucchele mode; morð-gomen wrohten.
     11432
and for heore hehȝe cunne; ælc wolde beon wið-inne.
     11433
Ah ich þe wulle wurche; a bord swiðe hende.
     11434
þat þer maȝen sitten to; sixtene hundred & ma.
     11435
al turn abuten; þat nan ne beon wið-uten.
     11436
wið-uten and wið-inne. mon to-ȝæines monne. Page  598
     11437
Whenne þu wult riden; wið þe þu miht hit leden.
     11438
and setten hit whar þu wulle; after þine i-wille.
     11439
and ne dert þu nauere adrede; to þere worlde longen.
     11440
þat æuere æ[ni]e modi cniht. at þine borde makie fiht.
     11441
for þer scal þe hehȝe; beon æfne þan loȝe.
     11442
Timber me lete biwinnen. and þat beord bi-ginnen.
     11443
to feouwer wikene uirste; þat wrec wes iuorðed.
     11444
To ane heȝe dæie; þat hired wes isomned.
     11445
and Arður himseolf beh; sone to þan borde.
     11446
and hehte alle his cnihtes; to þan borde forð-rihtes.
     11447
Þo alle weoren iseten; cnihtes to heore mete.
     11448
þa spæc ælc wið oðer; alse hit weore his broðer.
     11449
alle heo seten a-buten; ne((s)) þer nan wið-uten.
     11450
Æuere ælches cunne((s)) cniht; þere wes swiðe wel idiht.
     11451
alle heo weoren bi ane; þa hehȝe & þa laȝe.
     11452
ne mihten þer nan ȝelpen; for oðere kunnes scenchen.
     11453
oðer his iueren; þe at þan beorde weoren.
     11454
Þis wes þat ilke bord; þat Bruttes of ȝelpeð.
     11455
and sugeð feole cunne lesinge; bi Arðure þan kinge.
     11456
Swa deð auer-alc mon; þe oðer luuien con.
     11457
ȝif he is him to leof; þenne wule he liȝen.
     11458
and suggen on him wurð-scipe; mare þenne he beon wurðe.
     11459
ne beo he no swa luðer mon; þat his freond him wel ne on.
     11460
Æft ȝif on uolke feond-scipe arereð.
     11461
an æuer-æi time; bitweone twon monnen.
     11462
me con bi þan læðe; lasinge suggen.
     11463
þeh he weore þe bezste mon; þe æuere æt at borde.
     11464
þe mon þe him weore lað; him cuðe. last finden.
     11465
Ne al soh ne al les; þat leod-scopes singeð.
     11466
ah þis is þat soððe; bi Arðure þan kinge.
     11467
Nes næuer ar swulc king; swa duhti þurh alle þing.
     11468
for þat soðe stod a þan writen; hu hit is iwurðen.
     11469
ord from þan ænden; of Ar[ð]ure þan kinge.
     11470
no mare no lasse; buten alse his laȝen weoren.
     11471
Ah Bruttes hine luueden swiðe; & ofte him on liȝeð.
     11472
and suggeð feole þinges; bi Arðure þan kinge.
     11473
þat næuere nes i-wurðen; a þissere weorlde-richen. Page  600
     11474
inoh he mai suggen; þe soð wule uremmen.
     11475
seolcuðe þinges; bi Arðure kinge.
     11476
Þa wes Arður. swiðe heh; his hired swiðe hende.
     11477
þat nas na cniht wel itald; no of his tuhlen swiðe bald.
     11478
inne Wales no in Ænglelond; inne Scot[lond] no in Irlond.
     11479
in Normandie no inne France; inne Flandres no inne Denemarc.
     11480
no in nauere none londe; þe a þeos halfe Mungiu stondeð.
     11481
þet weoren ihalde god cniht; no his deden itald oht.
     11482
bute he cuðe of Ar[ð]ure; & of aðelen his hirede.
     11483
his wepnen and his weden; & his hors-leden.
     11484
suggen and singen; of Arðure þan ginge.
     11485
and of his hir((ed))-cnihten; and of heȝe heore mihten.
     11486
and of heore riche-dome; and hu wel hit heom bicomen.
     11487
Þenne weore he wilcume; a þissere weorlde-richen.
     11488
come þer he come; and þeh he weore i Rome.
     11489
al þat iherde of Ar[ð]ure telle.
     11490
heom þuhte muchel seollic; of selen þan kinge.
     11491
And swa hit wes iuuren iboded; ær he iboren weoren.
     11492
swa him sæide Merlin; þe witeȝe wes mære.
     11493
þat a king sculde cume; of Vðere Pendragune.
     11494
þat gleomen sculden wurchen burd; of þas ki[n]ges breosten.
     11495
and þer-to sitten; scopes swiðe sele.
     11496
and eten heore wullen; ær heo þenne fusden.
     11497
and winscenches ut teon; of þeos kinges tungen.
     11498
and drinken & dreomen; daies & nihtes.
     11499
þis gomen heom sculde i-lasten; to þere weorlde longe.
     11500