Layamon's Brut (British Museum Ms. Cotton Caligula A.IX)
Layamon

Lines 11301 through 11400

Hail seo þu Arður; aðelest Brutten.
     11301
Ich hatten Rumareð; þe king of Winet-londe.
     11302
i-noh ich habbe iherd kenne; of ken-scipe þine.
     11303
þat þu ært widen i-cuð; kingen alre kennest.
     11304
Þu hauest moni kine-lond; biȝiten al to þire hond.
     11305
nis na king an londe; þe þe maȝen stonde.
     11306
king ne na kaisere; in nauere nane compe.
     11307
of al þat þu biȝinnest; þu dest þine iwille.
     11308
Her ich æm to þe icume; and broht þe mine aldeste sune.
     11309
her ich sette þe an hond; me seoluen and mi kine-lond;
     11310
and minne sune leofe; and mine leoden alle.
     11311
wif & mine weden; and alle mine wunnen.
     11312
wið þat þu me griðie; wið þine grim ræsen.
     11313
And beo þu min hæhȝe king; and ich wulle beon þin under-ling.
     11314
and senden þe to honde; fif hundred pund of golde.
     11315
þas ȝeuen ich finde þe wulle; æue[r]-alche ȝere
     11316
Al Arður him ȝette; þat þe king ȝirde.
     11317
and seoððen he heolde runen; wið sele his þeinen.
     11318
& seide þat he wolde; aȝæin to þisse londe.
     11319
and iseon Wenhaiuer; þe wuneliche quene.
     11320
Bemen he lette blawen; & bonnien his ferden.
     11321
and to scipen wenden; wunder bliðe. þeines.
     11322
Wind heom stod on willen; weder alse heo wolden. Page  592
     11323
bliðe heo weoren alle for þi; up heo comen at Grimesbi.
     11324
Þat iherden sone; þa hæhste of þissen londe.
     11325
and to þære quene com tidende; of Arðure þan kinge.
     11326
þat he wes isund icumen; & his folc on selen.
     11327
Þa weoren inne Bruttene; blissen inoȝe.
     11328
Her wes fiðelinge and song; her wes harpinge imong.
     11329
pipen & bemen. murie þer sungen.
     11330
Scopes þer sungen; of Arðure þan kingen.
     11331
& of þan muchele wurð-scipe; þe he iwunnen hafeden.
     11332
folc com to hirede; of feole cunne þeode.
     11333
widen and siden; folc wes on selen.
     11334
Al þat Arður isæh; al hit him to bæh.
     11335
riche men and pouere; swa þe haȝel ualleð.
     11336
nes þer nan swa wræcche Brut; þat he nes awælȝed.
     11337
Her mon mai arede; of Arðure þan king.
     11338
hu he twelf ȝere; seoðen wuneden here.
     11339
inne griðe & inne friðe; in alle uæȝernesse.
     11340
Na man him ne faht wið; no he ne makede nan un-frið.
     11341
ne mihte nauere nan man; bi-þenchen of blissen.
     11342
þat weoren in æi þeode. mare þan i þisse.
     11343
ne mihte nauere mon-cunne; nan swa muchel wunne.
     11344
swa wes mid Arðure; & mid his folke here.
     11345
Ich mai sugge; hu hit iwarð; wunder þæh hit þunche.
     11346
Hit wes in ane ȝeol-dæie; þat Arður in Lundene lai.
     11347
þa weoren him to i-cumen; of alle his kinerichen.
     11348
of Brutlonde; of Scotlonde; of Irlonde; of Islonde.
     11349
and of al þan londe; þe Arður hæfede an honde.
     11350
alle þa hæxte þeines; mid horsen & mid sweines.
     11351
Þer weoren seouen kingene sunes; mid seouen hundred cnihten icumen.
     11352
wið-uten þan hired; þe herede Arðure.
     11353
Ælc hafede an heorte; leches heȝe.
     11354
and lette þat he weore; betere þan his iuere.
     11355
Þat folc wes of feole londe; þer wes muchel onde.
     11356
for þe an hine talde hæh; þe oðer muche herre.
     11357
Þa bleou mon þa bemen; & þa bordes bradden.
     11358
water me brohte an uloren; mid guldene læflen.
     11359
seoððen claðes soften; al of white seolke.
     11360
Þa sat Arður adun; & bi him Wenhauer þa quene. Page  594
     11361
seoððen sete þa eorles; and þer-after þa beornes.
     11362
seoððen þa cnihtes; al swa mon heom dihte.
     11363
Þa heȝe iborne; þene mete beoren.
     11364
æfne forð-rihten; þa to þan cnihten.
     11365
þa tou-ward þan þæinen; þa touward þan sweinen.
     11366
þa touward þan bermonnen; forð at þan borden.
     11367
Þa duȝeðe wærð iwraððed; duntes þer weoren riue.
     11368
ærest þa laues heo weorpen; þa while þa heo ilæsten.
     11369
and þa bollen seoluerne; mid wine iuulled.
     11370
& seo[ðð]en þa uustes; uusden to sweoren.
     11371
Þa leop þer forð a ȝung mon; þe ut of Winet-londe com.
     11372
he wes iȝefen Arðure; to halden to ȝisle.
     11373
he wes Rumarettes sune; þas kinges of Winette.
     11374
Þus seide þe cniht þere; to Arðure kinge.
     11375
Lauerd Arður buh raðe; into þine bure.
     11376
and þi quene mid þe & þine mæies cuðe;
     11377
& we þis comp scullen to-delen; wið þas uncuðe kempen.
     11378
Æfne þan worde; he leop to þan borde.
     11379
þer leien þa cniues; bi-foren þan leod-kinge.
     11380
þreo cnifes he igrap; and mid þan anæ he smat.
     11381
i þere swere þe cniht; þe ærest bi-gon þat ilke fiht.
     11382
þat his hefued i þene flor; hælde to grunde.
     11383
Sone he sloh ænne oðer; þes ilke þeines broðer.
     11384
ær þa sweordes comen; seouene he afelde.
     11385
Þer wes fæht swiðe græt; ælc mon oðer smat.
     11386
þer wes muchel blod-gute; balu wes an hirede.
     11387
Þa com þe king buȝen; ut of his buren.
     11388
mid him an hundred beornen; mid helmen & mid burnen.
     11389
ælc bar an his riht hond; whit stelene bro[n]d.
     11390
Þa cleopede Arður; aðelest kingen.
     11391
Sitteð sitteð swiðe; elc mon bi his liue.
     11392
and wa-swa þat nulle don; he scal for-demed beon.
     11393
Nimeð me þene ilke mon; þa þis feht ærst bigon.
     11394
& doð wiððe an his sweore; & draȝeð hine to ane more.
     11395
& doð hine in an ((ley)) uen; þer he scal liggen.
     11396
and nimeð al his nexte cun; þa ȝe maȝen iuinden.
     11397
and swengeð of þa hafden; mid breoden eouwer sweorden.
     11398
Þa wifmen þa ȝe maȝen ifinden; of his nexten cunden. Page  596
     11399
kerueð of hire neose; & heore wlite ga to lose.
     11400