Layamon's Brut (British Museum Ms. Cotton Caligula A.IX)
Layamon

Lines 10501 through 10600

Arður wes bi norðe; and noht her-of nuste.
     10501
ferde ȝeond al Scot-lond; & sette hit an his aȝere hond.
     10502
Orcaneie & Galeweie; Man and Murene.
     10503
and alle þa londes; þe þer-to læien.
     10504
Arður hit wende; to iwislichen þinge.
     10505
þat Childric iliðen weore; to his aȝene londe.
     10506
and þat he nauere-mære; nolde cumen here.
     10507
Þa comen þa tidende; to Arthure kinge.
     10508
þat Childric þa kæisere; icumen wes to londen.
     10509
and i þan suð ende; sorȝen þer worhten.
     10510
þa Arður seide; aðelest kingen.
     10511
Wala-wa walawa; þat ich sparede mine iua.
     10512
þat ich nauede on holte; mid hungere hine ad[r]efed.
     10513
oðer mid sweorde; al hine to-swu[n]gen.
     10514
Nu he me ȝilt mede; for mire god dede.
     10515
ah swa me hælpen Drihten; þæ scop þæs dæies lihten.
     10516
þer-fore he scal ibiden; bitterest alre baluwen.
     10517
harde gomenes; his bone ich wulle iwurðen.
     10518
Colgrim & Baldulf beiene ich wulle aquellen.
     10519
& al heore duȝeðe; dæð scal iðolien.
     10520
Ȝif hit wule ivnnen; Waldende hæfnen.
     10521
ich wulle wurðliche wreken; alle his wiðer-deden.
     10522
ȝif me mot ilasten; þat lif a mire breosten.
     10523
& hit wulle me iunne. þat i-scop mone & sunne.
     10524
ne scal nauere Childric; æft me bi-charren.
     10525
Nu cleopede Arður; aðelest kingen.
     10526
Whar beo ȝe mine cnihtes; ohte men & wiðte.
     10527
To horse; to horse; haleðes gode.
     10528
and we sculle[ð] buȝen; touward Baðe swiðe.
     10529
Leteð up fusen; heȝe forken.
     10530
& bringeð her þa ȝæsles; biforen ure cnihtes.
     10531
and heo scullen hongien; on hæȝe treowen.
     10532
Þer he lette fordon; feouwer & twe[n]ti childerren.
     10533
Alemainisce men; of swi[ð]e heȝe cunnen.
     10534
Þa comen tidende; to Arðure þan kinge.
     10535
þat seoc wes Howel his mæi; þer-fore he wes sari. Page  550
     10536
i Clud ligginde; & þer he hine bilæfde.
     10537
Hiȝenliche swiðe; forð he gon liðe.
     10538
þat he bihalues Ba[ð]e; beh to ane uelde.
     10539
þer he alihte; & his cnihtes alle.
     10540
and on mid heore burnen; beornes sturne.
     10541
& he a fif dæle; dælde his ferde.
     10542
Þa he hafde al iset; and al hit isemed.
     10543
þa dude he on his burne; ibroide of stele.
     10544
þe makede on aluisc smið; mid aðelen his crafte.
     10545
he wes ihaten Wygar; þe Witeȝe wurhte.
     10546
His sconken he helede; mid hosen of stele.
     10547
Calibeorne his sweor[d]; he sweinde bi his side.
     10548
hit wes iworht in Aualun; mi[d] wiȝele-fulle craften.
     10549
Halm he set on hafde; hæh of stele.
     10550
þer-on wes moni ȝim-ston; al mid golde bi-gon.
     10551
he wes V[ð]eres; þas aðelen kinges.
     10552
he wes ihaten Goswhit; ælchen oðere vnilic.
     10553
He heng an his sweore; ænne sceld deore.
     10554
his nome wes on Bruttisc; Pridwen ihaten.
     10555
þer wes innen igrauen; mid rede golde stauen.
     10556
an on-licnes deore; of Drihtenes moder.
     10557
His spere he nom an honde; þa Ron wes ihaten.
     10558
Þa he hafden al his i-weden; þa leop he on his steden.
     10559
Þa he mihte bihalden; þa bihalues stoden.
     10560
þene uæireste cniht; þe verde scolde leden.
     10561
ne isæh næuere na man; selere cniht nenne.
     10562
þene him wes Arður; aðelest cunnes.
     10563
Þa cleopede Arður; ludere stæfne.
     10564
Lou war her biforen us; heðene hundes;
     10565
þe sloȝen ure alderen; mid luðere heore craften.
     10566
and heo us beoð on londe; læðest alre þinge.
     10567
Nu fusen we hom to; & stærcliche heom leggen on.
     10568
& wræken wunder-liche; ure cun & ure riche.
     10569
& wreken þene muchele scome; þat heo us i-scend habbeoð.
     10570
þat heo ouer vðen; comen to Derte-muðen.
     10571
& alle heo beoð for-sworene; & alle heo beoð for-lorene.
     10572
heo beoð for-demed alle mid Driht%tenes fulste. Page  552
     10573
Fuse we nu forð-ward; uaste to-somne.
     10574
æfne al swa softe; swa we nan ufel ne þohten.
     10575
and þenne we heom cumeð to; mi-seolf ic wullen on-fon.
     10576
an alre freomeste; þat fiht ich wulle big[i]nnen.
     10577
Nu we scullen riden. and ouer lond gliden.
     10578
and na man bi his liue; lude ne wurchen.
     10579
ah faren fæstliche; Drihten us fulsten.
     10580
Þa riden agon; Arður þe riche mon.
     10581
beh ouer wælde; & Baðe wolde isechen.
     10582
Þa tidende com to Childriche; þan strongen & þan richen.
     10583
þat Arður mid ferde com; al ȝaru to fihte.
     10584
Childric & his ohte men; leopen heom to horsen.
     10585
igripen heore wepnen; heo wusten heom ifæied.
     10586
Þis isæh Arður; aðelest kinge.
     10587
isæh he ænne. hæðene eorl. hælden him to-ȝeines.
     10588
mid seouen hundred. cnihten; al ȝærewe to fihten.
     10589
Þe orl him-seolf ferde; bi-foren al his genge.
     10590
& Arður him-seolf arnde; bi-uoren al his ferde.
     10591
Arður þe ræie; Ron nom an honde.
     10592
he stræhte scaft stærcne; stiðimoden king.
     10593
his hors he lette irnen; þat þa eorðe dune((de)).
     10594
Sceld he braid on breosten; þe king wes abolȝen.
     10595
he smat Borel þene eorl; þurh-ut þa breosten.
     10596
þat þæ heorte to-chan; and þe king cleopede anan.
     10597
Þe formeste is fæie; nu fulsten us Drihte.
     10598
and þa hefen-liche quene; þa Drihten akende.
     10599
Þa cleopede Arður; aðelest kinge.
     10600