Layamon's Brut (British Museum Ms. Cotton Caligula A.IX)
Layamon

Lines 10001 through 10100

þat he touward him com; and wolde him vfel don.
     10001
Colgrim hine biþohte; whæt he don mahte.
     10002
& bonnede his uerde; ȝeond al þan norð ærde.
     10003
Þer liðen to-somne; alle Scotleode.
     10004
Peohtes & Sæxes; siȝen heom to-gæderes.
     10005
& moniennes cunnes men; uuleden Colgrimen.
     10006
Forð he gon fusen; mid vnimete verde.
     10007
to-ȝaines Arðure; aðelest kingen.
     10008
he þohte to quellen; þe king on his þeoden.
     10009
& his folc ual[l]en; uolden to grunden. Page  522
     10010
& setten al þis kine-lond; an his aȝere hond.
     10011
& fallen to þan grunde; Arður þene ȝunge.
     10012
Forð wende Colgrim; & his ferde mid him.
     10013
& wende mid his ferde; þat he com to ane watere.
     10014
þat water is ihaten Duglas; duȝeðen hit aquel[d]e
     10015
Þer com Arður him a-ȝein. ȝaru mid his fehte.
     10016
in ane brade forde; þa ferden heom imetten.
     10017
fastliche on-sloȝen; snelle heore ke[m]pen.
     10018
feollen þa uæie; uolden to grunde.
     10019
Þer wes muchel blod-gute; balu þer wes riue.
     10020
brustlede scæftes; beornes þer ueollen.
     10021
Þat isæh Arður; on mode him wes unneðe.
     10022
Arður hine biðohte; whæt he don mahte.
     10023
& t[eh] hine a-bac-ward; in enne uald brade.
     10024
Þa wenden his feond; þat he flæn walde.
     10025
þa wes glad Colgrim; and al his ferde mid him.
     10026
heo wenden þat Arður; mid arhðe weore afallæd þere.
     10027
& tuȝen ouer þat water; alse heo wode weoren.
     10028
Þa Arður þat isah; þat Colgrim him wes swa neh.
     10029
& heo weoren beien; bihalu((e))s þan wateren.
     10030
þus seide Arður; aðelest kingen.
     10031
Iseo ȝe mine Bruttes; here us bi[h]alfues.
     10032
ure iuan uulle; Crist heom a-ualle.
     10033
Colgrim þene stronge; ut of Sæx-londe.
     10034
His cun i þisse londe; ure ælderne a-qualden.
     10035
ah nu is þe dæi icumen; þe Drihten haueð idemed.
     10036
þat he scal þat lif leosen; & leosien his freonden.
     10037
oðer we sculle dæde beon; ne muȝe we hine quic iseon.
     10038
Scullen Sæxisce men; sorȝen ibiden.
     10039
& we wreken wurhliche; ure wine-maies.
     10040
Vp bræid Arður his sceld; foren to his breosten.
     10041
& he gon to rusien; swa þe runie wulf.
     10042
þenne he cumeð of holte; bi-honged mid snawe.
     10043
and þencheð to biten; swulc deor swa him likeð.
     10044
Arður þa cleopede; to leofe his cnihten.
     10045
For[ð] we biliue; þeines ohte.
     10046
alle some[d] heom to; alle we sculleð wel don. Page  524
     10047
& heo uorð hælden; swa þe hæȝe wude.
     10048
þenne wind wode. weieð hine mid mæine.
     10049
Fluȝen ouer þe woldes. þritti þusend sceldes.
     10050
& smiten a Colgrimes cnihtes; þat þa eorðe aȝæn quehte.
     10051
Breken braden speren; brustleden sceldes.
     10052
feollen Sæxisce men; folden to grunden.
     10053
Þat isah Colgrim; þer-uore wa wes him.
     10054
þe alre hendeste mon; þe ut of Sexlonde com.
     10055
Colgrim gon to flænne; feondliche swiðe.
     10056
& his hors hine bar; mid hæhȝere strengðe.
     10057
ouer þat water deope; & scelde hine wið dæðe.
     10058
Saxes gunnen sinken; sorȝe heom wes ȝiueðe.
     10059
Arður wende his speres ord; and for-stod heom þene uord.
     10060
þer adruncke Sexes; fulle seoue þusend.
     10061
Summe heo gunnen wondrien; swa doð þe wilde cron.
     10062
i þan mor-uenne; þenne his floc is awemmed.
     10063
& him halde[ð] after; hauekes swifte.
     10064
hundes in þan reode; mid reouðe hine imeteð.
     10065
þenne nis him neouðer god. no þat lond no þat flod.
     10066
hauekes hine smiteð; hundes hine biteð.
     10067
þenne bið þe kinewurðe foȝel; fæie on his siðe.
     10068
Colgrim ouer feldes; flæh him biliues.
     10069
þat he com to Eouerwic; riden swiðe sellic.
     10070
he wenden into burȝe; & faste heo biclusde.
     10071
hafuede he binnen; ten þusend monnen.
     10072
burh-men mid þa beztse; þe him bihalues weoren.
     10073
Arður halde after; mid þritti þusend cnihten.
     10074
& ferde riht to Eouerwic. mid folke swiðe sellic. Page  526
     10075
and bi-læi Colgrim; þe weorrede aȝæin him.
     10076
Seouen niht þer biuoren; wes suð-ward ifaren.
     10077
Baldolf þe hende; broðer Colgrimes.
     10078
and lai bi þare sæ-brimme; & abad Childrichen.
     10079
Childric wes i þan daȝen; cæiser of riche laȝen.
     10080
inne Alemaine; þat aðel wes his aȝene.
     10081
Þa i-herde Baldolf; þer he bi sæ lai.
     10082
þat Arður hafde inne Eouerwic; Colgrim biclused.
     10083
Baldolf hæfde ibonned; seouen þusend monnen.
     10084
baldere beornnen; þe bi sæ leien.
     10085
heo nomen heom to ræden; þat aȝæin heo wolden riden.
     10086
and bi-læuen Childric; & faren in-to Eouerwic.
     10087
& fehten wi[ð] Arðure; & aquellen al his duȝeðe.
     10088
Baldolf swor on his grome; þat he wolde beon Ar[ð]ures bone.
     10089
& bruken al þas riche; mid Colgrime his broðere.
     10090
Nolde Baldolf abide; þan keisere Childriche.
     10091
ah þenne he ferde uorð; and droh him forð-rihtes nor[ð].
     10092
from dæie to dæie; mid bald((r))e duȝeðe.
     10093
þat he com in ane wude; in ane wilderne.
     10094
from Ar[ð]ures ferde; fulle seoue milen.
     10095
He hafde iþohte bi nihten; mid seouen þusend cnihten.
     10096
to riden uppen Arður; ær þe king ((wore war)).
     10097
and his folc afeollen & hine seolf aquelle.
     10098
Ah al hit oðer iwarð; oðer he iwende.
     10099
for Baldolf hafede on hirede; ænne cniht Bruttiscne.
     10100