Layamon's Brut (British Museum Ms. Cotton Caligula A.IX)
Layamon

Lines 9901 through 10000

Ærður ihaten; bezst alre cnihten.
     9901
and suggen þat he cumen sone; to his kinedome.
     9902
for dæd him wes Vðer; al-swa Aurilien wes ær.
     9903
and Vðer Pendragune; nefde nenne oðerne sune.
     9904
þat mihte after his daȝen; halden Bruttes to laȝe.
     9905
mid wurð-scipe halden; & þisne kinedom walden.
     9906
For ȝæt weoren in þissen londe; Sæxes at-stonden.
     9907
Colgrim þe kene; and moni þusend of his iueren.
     9908
þa ofte ure Bruttes; makeden hufele burstes.
     9909
Bruttes ful sone; þreo biscopes nomen.
     9910
and ridæres seouene; ræiȝe on wisdome.
     9911
forð heo gunnen buȝen; in-to Bruttaine.
     9912
& heo ful sone; to Ærðure comen.
     9913
Hail seo þu Arður; aðelest cnihten.
     9914
Vðer þe græten; þa he sculde iwiten.
     9915
& bæd þat þu sculdest; a Brutten þe seoluen.
     9916
halden laȝen rihte; & hælpen þine folke.
     9917
and witen þisne kinedom. swa god king sculden don.
     9918
þine feond flæmen; & driuen heom of londen.
     9919
& he bad þe to fultume; þene milde Godes sune.
     9920
þat þu mostes wel don; & þat lond of Godde a-fon.
     9921
for dæd is Vðer Pendragun; & þu ært Ærður his sune.
     9922
& dæd is þe oðer; Aurilien his broðer.
     9923
Þus heo gunnen tellen; & Arður sæt ful stille.
     9924
ænne stunde he wes blac; and on heuwe swiðe wak.
     9925
ane while he wes reod; and reousede on heorte.
     9926
Þa hit alles up brac; hit wes god þat he spac.
     9927
þus him sæide þer-riht; Arður þe aðele cniht.
     9928
Lauerd Crist Godes sune; beon us nu a fultume.
     9929
þat ich mote on life; Goddes laȝen halden.
     9930
Fif-tene ȝere wes Ar[ð]ur ald; þa þis tiðende him wes itald.
     9931
& alle heo weoren wel bitoȝen; for he wes swiðe iðoȝe.
     9932
Ærður forð-rihtes; cleopede his cnihtes. Page  518
     9933
& hæhte æuer-ælcne mon; bonnien his weppnen.
     9934
& heore hors sadelie; hiȝendliche swiðe.
     9935
for he wolde buȝe; to þissere Brutene.
     9936
To þere sæ wenden; sele þeines.
     9937
at Mihæles Munte; mid muchelere uerede.
     9938
þa sæ heo sætten a þat strond; at Suð-ham-tune heo comen alond.
     9939
Forð him gon ride; Arður þe riche.
     9940
riht to Selechæstre; þer him sel þuhte.
     9941
þer wes; Bruttene weored; baldeliche isomned.
     9942
Muchel wes þa blisse; þa Arður com to burhȝe.
     9943
þer wes bemene blæst; & swiðe glade beornes.
     9944
þer heo houen to kinge; Arður þene ȝunge.
     9945
Þa þe Arður wes king; hærne nu seollic þing.
     9946
he wes mete-custi; ælche quike monne.
     9947
cniht mid þan bezste; w[u]nder ane kene.
     9948
he wes þan ȝungen for fader; þan alden for frouer.
     9949
and wið þan vnwise; w[u]nder ane sturnne.
     9950
woh him wes wunder lað. and þat rihte a leof;
     9951
Ælc of his birlen; & of his bur-þæinen.
     9952
& his ber-cnihtes; gold beren an honden.
     9953
to ruggen and to bedde; iscrud mid gode webbe,
     9954
Nefde he neuere nænne coc; þat he nes keppe swi[ð]e god.
     9955
neuær nanes cnihtes swein; þat he næs bald þein.
     9956
Þe king heold al his hired; mid hæȝere blise.
     9957
& mid swulche þinges; he ouer-com alle kinges.
     9958
mid ræhȝere strengðe; & mid riche-dome.
     9959
swulche weoren his custes; þat al uolc hit wuste.
     9960
Nu wes Arður god king; his hired hine lufede.
     9961
æc hit wes cuð wide; of his kine-dome.
     9962
Þe king huld i Lundene; ane muchele hustinge.
     9963
þer-to weoren ilaðede; his leond-cnihtes alle.
     9964
riche men and hæne; to hæȝen þan king.
     9965
Þa þe hit wes al icume; uolc vnimete.
     9966
vp a-ræs Arður; aðelest kingen.
     9967
& lette bringen him biforen; halidomes wel icoren.
     9968
þer-to gon cneoli; þe king sume þrie.
     9969
nuste noht his duȝeðe; what he deme wolde.
     9970
Arður heold up his riht hond; ænne að he þer swor
     9971
þat næuere bi his liue; for nanes monnes lære. Page  520
     9972
ne sculden inne Brutene; Sæxes wurðen bliðe.
     9973
londes beon wurðen; no wurð-scipe bruke.
     9974
ah he heom wolde flemen; for heo weoren iuæid wið him.
     9975
sloȝen Vðer Pendragune; þe wes Costa[n]ces sune.
     9976
swa heo duden þene o[ð]er; Aurilien his broðer.
     9977
for þi heo weoren on londe; laðest alre uolke.
     9978
Arður. forð-rihtes; nom his wise cnihtes.
     9979
weore heom lef. weore heom lað; alle heo sworen þene að.
     9980
trouliche þat heo wolden; mid Arðure halden.
     9981
& wreken þene king Vðer; þat Sæxes aqualden her.
     9982
Arður his writen sende; wide ȝeond his londe.
     9983
after alle þan cnihten; þe he biȝiten mihte.
     9984
þat heo ful sone; to þan kinge comen.
     9985
& he heom wolde on londe; leofliche at-halden.
     9986
scipien heom mid londe; mid seoluere & mid golde.
     9987
Forð þe king ferde; mid vnimete uerde.
     9988
folc he ledde sællic; & ferde riht to Eouerwic.
     9989
Þer he læi ane niht; amærwe he ferde forð-riht.
     9990
þer he wuste Colgrim; & his iueren mid him.
     9991
S[eo]ððen Octa wes of-slaȝen; & idon of lif-dæȝen.
     9992
þe wes Hengestes sune; vt of Sæxlonde icumen.
     9993
Colgrim wes þe hæhst mon; þat ut of Sax-londe com.
     9994
after Hengeste; & Horse his broðer.
     9995
& Octa & Ossa; and heore iuere Ebissa.
     9996
Heold a þan ilke dæȝen; Colgrim Sæxes to laȝen.
     9997
ladde & radde; mid ræȝere strengðe.
     9998
muchel wes þat moncun; þat ferde mid Colgrim.
     9999
Colgrim iherde tidende; of Arðu[r]e þan kinge.
     10000