[LII.]
(THE FABLE OF THE CAT AND THE FOX.)Addit. MS. 9066.
[leaf 61 (cont'd)]
Story.
The foxe and the Catte mette onys to-gedgre. the foxe seide to the Catte, "how many wyles or sleightes haste thou, or knowes?" The Catte seide, "but oon alone." The foxe seide, "what is that?" The Catte seide, "when houndes folow me, I can̛ renne vpon̛ a tre, and̛ so scape from hem." Then the catte askid̛ the foxe, how many wiles or sleightes he had̛, or knewe? he saide, "I haue xviijen. and̛ a bage fuƚƚ moo; therfore come with me, and̛ I shaƚƚ teche the my crafte; and̛ when thou knowes hem, thou shalte wele scape the bytyng̘ of the houndes." and̛ they wentyn to-gedre. they herd̛ hunters and̛ houndes, folowyng̘ hem at here back. The Catte seide, "I here houndes, and̛ am aferde." then seide þe foxe, "drede the not, thegh the houndes come nere." The catte [seide], "fore sothe I folowe no lengere the; I wil vse myn owne wile." and̛ wente vp into a Tree, and̛ so scaped̛ the houndes. And̛ the houndes folowdyn, and̛ anone felle on the foxe, and̛ tokyn̛ [leaf 61, back] hym. The catte sate on lofte, on the tree, and̛ beheld̛ what they didden to the foxe; and̛ cried̛, "foxe! opyn thi bagge of̘ wiles, and̛ helpe thy selfe, for thou haddiste neuer more nede; for aƚƚ thy wiles helpith the not!"