Capitulum quadragesimum primum.
KYNGE Edwarde diede in this yere at Burghe uppon sonde nye to Caerliel, in the feste of the translacion of seynte Thomas and the xxxvti yere of his reigne. The dethe of whom Robert archebischop of Cawnterbery see in his slepe, beynge in exile that tyme at the cowrte of Rome. Whom Edwarde the secunde and his son did succede, whiche callede his luffe Petyr Gavaston to the realme ageyne, makynge hym duke of Corne|waille, and toke to hym the governaunce of Ynglonde whiles that he taryede behynde see for mariage. For he maryede Isabel, doȝhter of Philippe kynge of Fraunce, at Bonony. Whiche returnede thens was crownede kynge of Ynglonde at Westemynstre of the bischop of Wynchestre by auctorite of pope Clement, in the Sonneday of Quinquagesme, in that Robert Page 299, vol.8 archebischop of Cawnterbery was þat tyme in exile at Rome. This kynge Edwarde was a semely man of body, myȝhty in strengthe, but moche inconstant. For the seide kynge des|pisynge the cownsaile of the noble men of his realme, drawede to harlottes, syngers, carters, and to schippemen, ȝiffynge hym to ryette, exaltynge over moche a man that he hade luffed. Whiche causede obprobry to the kynge, obloquy to that oþer person, sclawnder to the peple, and hurte to the realme. And Page 301, vol.8 mony thynges and grete treasures ȝiffen to hym for to repelle the Scottes, were spende and wastede amonge harlottes and in excesse. But oon thynge was as fortunate to þis kynge, that Wales rebellede not ageyne hym, but oþer thynges were in|fortunate to hym. In his begynnynge he revokede Petyr Gavaston from exile, whose felowschip he hade abiurede by commaundement of his fader; by þe presence of whom he des|pisede his qwene Isabell, and despisede also the noble men of the londe. Wherefore the noble men of the realme havynge [folio 386a] indignacioun þerof, expulsede the seide Petyr unto Yrlonde, where the treasures of þe kynge beynge were spende frely. But the seide Petyr was callede soone ageyne, whom the noble men of the realme expellede from the kynge, and toke Page 303, vol.8 the treasures of theyme in the partes of Northumbrelonde, and toke the seide Petyr at the castelle of Scardeburghe, and heded hym at Gaverissiche nye to Warwyke. The seide Petyr sleyne, the seide kynge Edward drawede to unhoneste com|panye as he usede afore, wherefore a cownesaile provincialle was hade by Robert archebischoppe of Cawnterbery, in whiche cownsaile mony hollesomme thynges were ordeynede to the utilite of the realme. The kynge makynge an othe to observe the constitucions þer, returnede soone after to his olde com|panye, and to thynges prohibite by the seide constitucions. Wherefore the noble men of the realme, the metropolitan, and Thomas erle of Lancaster, with mony other noble men, were vexede moche ageyne the kynge. Petyr of Gavaston was in Yrlonde in this yere in exile, causede by þe noble men of the Page 305, vol.8 realme ageyne the wylle of the kynge, which was callede from exile in the yere folowynge, whom the kynge mette at Chestre. The kynge goynge abowte with hym lefte hym at the castelle of Scardeburghe, whom the noble men of the realme toke þer, and brouȝhte hym to Dadynton, and did sle hym nye to War|wyke. The seide Petyr heded at Gaverssiche in the feste of seyntes Gervasius and Prothasius. Edwarde the þrydde was borne at Wyndeshore, in the day of seynte Bricius. And Robert archebischoppe of Cawnterbery diede, and maister Thomas Cobham, a noble clerke, was electe to be his succes|soure, but Walterus Reynalde, treasurer to the kynge, succedid in the seete of Cawnterbery by labore of the kynge, and maister Thomas Cobham was made bischoppe of Worcestre. That doen, the kynge wente to Scottelonde with grete pryde, but he was fowle devicte at Stryvelyn, in the feste of seynte John Baptiste, mony noble men other taken or sleyne, and the kynges treasures taken, the residu of the hostes gladde to flee. [folio 386b] Page 307, vol.8 And after that by xij. yere folowynge the northe partes of Ynglonde were vexede soore by the Scottes. Edward Bruz, broþer of Robert Bruz, entrede into Yrlonde to subdue hit to hym, neverthelesse he was sleyne in the iiijthe yere folowynge, in the day of seynte Calixt. A knyȝhte of Lancastreschire movede gwerre in this yere ageyne Thomas of Lancastre his lorde abowte the feste of seynte Michell, which was taken and heded abowte the feste of seynte Martyn.