Capitulum vicesimum sextum.
HENRE the thrydde sonne of Henre þe secunde, was emperour reignynge in Alemayne as xlti yere. This emperoure troublede in a tyme the churche ageyne Hildebrandus the pope, willynge to make an oþer; neverthelesse he was pleasede, and wente from Page 199, vol.7 þens to the Holy Lond with ij. dues, Godefridus and Boamundus, of whom hit schalle be seide in theire place. Steven the ixthe, abbot of the mownte Cassyne, succedid Victor the pope viij. monethes, whom Benedicte the xthe succeedid ix. monethes, whiche made pope by powere lefte that charge. Agelricus bischop of Dirham, levynge his seete voluntaryly, wente to the monastery of Petyrborowe, where he was noryschede, where [folio 330b] he lyvede quietely xij. yere; whom Agelwinus his broþer did succede. Marianus. The noble erle Leofricus, son of Leof|winus duke off the Marches, diede in this yere in his towne Bromleygh, the secunde kalendes of Octobre, and was beryede at Coventre in the monastery þat he made. Whiche erle encreasede in grete richesse and repairede mony monasterys, by the cownsaile of God and Marye his blissede moder, whom Godgiva his wife honourede moche, as the monastery Leofnense nye to Hereforde, þe monastery Wenlacense, of Worcestre, and of Evysham, and ij. churches in Westechestre, of Seynte Iohn and of Seynte Werburgg; the circumspeccion of whom was grete profite to þe realme of Ynglonde. ℞. And at the instance of his wife he made the cite of Coventre fre from tolle, excepte the toll of horses; and to make the cite free from that tolle the cowntesse Godgiva, his wife, did ryde nakede thro the myddes Page 201, vol.7 of the cite in a morowe, coverede but with here awne here. After the dethe of this Leofricus, Algarus his sonne receyvid the erledome of the Marches; whiche convicte of treason afore the kynge, was putte to exile in the same yere, but after that reconsilede ageyne. Willelmus de Regibus. A citesynne of Rome, Lucianus by name, a noble man of bloode, and of grete rychesse, mariede a woman Eugenia by name; wherefore he made a feste to his felawes, and after that thei hade dynede thei walkede unto the feldes for cause of pleasure and of diges|tion. This Lucianus willynge to play at the balle, putte his weddynge rynge on the fynger of an ymage nye to hym. But his body begynnynge to be feynte thro that laboure, he de|partede firste from that game, and goynge to that ymage to take his rynge, founde the fynger of þat ymage folden faste to the honde of þe ymage, with the rynge on hit. This man makynge moche laboure cowthe neiþer take the rynge neiþer breke the fynger, where he departede prively, levynge that thynge from his felawes leste thei scholde have skornede hym or elles oftaken the rynge awey in his absence. Whiche com|mynge to that place in the begynnynge of the nyȝhte, and fyndynge þe rynge taken awey and the fynger extente, mervaylede moche. After that this yonge man turnynge hym Page 203, vol.7 to his wife in bedde, felede a clowdy thynge and ruȝhe betwene theyme, seyenge to hym, "Lye with me, for thow hase weded me this day; I am Venus the godesse." The yonge man affrayede þerwith, slepede not that nyȝhte; this usede amonge theym by mony nyȝhtes, the yonge man after the cownesaile of his wife rehersede the processe of this mater to his fader. [folio 331a] Whiche wente to Palumbus the preste gretely instructe in nigromancy, and ȝafe to hym a grete rewarde for to fynde a remedy; whiche toke to the yonge man an epistole, com|maundynge hym to take hit to that person whom he mette in a certeyne place of the cite commynge processionally in the nyȝhte. This yonge man, stondynge in the strete at nyȝhte, see a woman as in vesture of ylle disposicion, rydynge on a mule, with her heire hongynge downe, havynge in her hedde a fillette of golde, with a rodde of golde also in her honde. This yonge man toke that epistole to the spiritte commynge laste. That principalle develle redynge that epistolle, and extendynge his hondes up to hevyn, seide: "O God omnipotent, how longe schalle the wickidnesse of Palumbus the preste indure." And so the spirittes toke that rynge from Venus, and restorede hit Page 205, vol.7 to the yonge man. Then Palumbus þe preste herynge the develles to crye to hevyn on hym, kyttynge the membres of his body, confessede to the pope his synnes, moche peple herynge hym. Marianus. Aldredus bischop of Worcestre made seynte Wulstan, prior of Worcestre, bischop þerof by licence of the kynge, takynge the seete of Wilton to Hermannus; whiche passynge the see wente to Hungary, and from that londe to Ierusalem, on pilgremage, whiche thynge noo bischop of Yng|londe performede afore hym. In Alemayne ij. monasteryes of Scottes were brente by theire awne negligence, whiche destruc|cion a monke þer, Paternus by name, seide afore to falle, whiche was a incluse, and in the tyme of that fire he wolde not goe Page 207, vol.7 furthe, but was brente. An ymage of marbole with a hedde of brasse, havynge a cercle contennynge this scripture in hit, "In the kalendes of Maii, the sonne beynge in the este, y schalle have a hedde of golde," was founde abowte this tyme in Apulia. A Saracene taken into captivite by the duke of that cuntre, understondynge that wrytynge, merkenge the ende of the schado of that ymage, founde þer treasure as infinite, whom he ȝafe for his redempcion.