Capitulum vicesimum primum.
HARDEKNUTUS commynge to Ynglonde reignede þer iij. yere, doynge not eny thynge worthy glory; sendynge anoon Alfricus archebischop of Yorke, with Godewinus the erle, to London, causede the body of kynge Harald, beryede but late Page 139, vol.7 afore, to be taken from the erthe, and the hedde kytte aweye, hit was caste into the water of Thamys, in signe and venge|aunce of the iniuryes doen to his moder by hym. But fischers fyndynge the body, beryede hit nobly. Also this Hardeknutus causede viij. marke of silvyr to be paiede to every schippe man in his schippes of the importable tribute of Ynglonde. Also he callede ageyne Emma his moder from exile, governynge the realme after hire cownesaile, and after Godewinus. This kynge puttynge to men of Ynglonde a tri|bute importable, ij. of the collectors of the seide kynge were sleyne at Worcestre. Wherefore that cite was destroyede and brente. Willelmus de Regibus libro secundo. This kynge Hardeknutus maryede his beautuous sustyr Guinulda to Henre the emperour, whiche accusede after that of adul|tery, her sonne whom sche brouȝhte from Ynglonde with here was assignede to fiȝhte ageyne the accuser of his moder; whiche yonge man hade victory ageyne the accuser of his moder, by the helpe of God. Guinulda, gladde of that victory, wolde not assente to themperour that he scholde fullefille the pleasure of the flesche with here after þat tyme; but sche refusynge his felowschippe, toke the habite of religion. Hen|ricus, libro sexto. In the tyme of this Hardeknutus, Alfridus and Edward, sonnes of Emma, after theire longe taryinge in Page 141, vol.7 Fraunce and Normandy, and also of Egelredus the kynge, come to Wynchestre to speke with theire moder, takynge mony knyȝhtes of Normandy with theym; Godwynus thenk|ynge to mary his doȝhter to Edwarde the yonger broþer, in that Alfridus his elder broþer wolde have skorne to marye with his doȝhter. Neverthelesse he seide to gentyllemen of the realme, that Alfride and Edwarde comme to the londe with so moche peple for somme treason, and not to speke with theire moder, wherefore thei were worthy to suffre dethe. Wherefore he did sle vj. c. of theyme at Gilleforde, for ix. of the Normannes were heded and the xthe was reservede; and after that he made theyme to be tythede ageyne, thenkynge the nowmbre over moche, causenge oon of theire guttes to be taken owte and fastede to a pale, and the bodye to be turnede abowte unto the laste partes of the inwarde partes or bowelles were extracte. Alfride takyn and made blynde, and after sende to Hely, lyvede not longe after; Emma herynge that sende Edwarde her sonne to Normandy. That erle Gode|winus blamede of the gentyllemen of the realme, and of Harde|knutus the kynge, for that offense swerede and made a protestacion, that he hade not do so but he was coacte by the strenȝthe of kynge Harald. Conradus the firste and emperour dedde, Henre the secunde, his sonne in lawe, was successoure Page 143, vol.7 to hym xvij. yere, of whom mony mervellous thynges be redde. This emperoure Henre putte from his cowrte alle ioculers and mynstrelles, and ȝafe to poore men the goodes he was wonte to ȝiffe to theyme. Willelmus de Regibus, libro secundo. This emperour hade a sustyr made a myncheon, whom he myȝhte unnethe suffre to be from hym. But hit happede a clerke of the courte to be of suche familiarite with the myncheon that he lay with here alle a nyȝhte. That clerke perceyvynge that hit hade snowede moche, and that the snawe hade coverede the grownde, thenkynge bothe perelle [folio 323b] and schame to be taken þer, causede the myncheon to bere hym on here backe owte thro the courte. But hit happede thempe|roure to aryse to make uryne the same tyme, and goynge to the wyndowe of his chambre, perceyvynge that, lauȝhed in his mynde, kepynge that thynge secrete. But a bischoppes seete vacante, he made that clerke bischop, sayinge, "Ryde not after this tyme on the backe of a woman." And also a monastery of myncheons vacante of a governoure, he toke hit to his suster, seyenge, "Take this monastery, and attende that thow bere not a clerke rydynge after this tyme;" and so thei abstenede from that wickid lyfe after that. This em|peroure goynge to here masse at a chapelle nye to a foreste, in the Sonneday of Quinquagesima prively, where a preste of grete deformite as in bodily beawte ministred, this em|perour mervaylede moche in mynde that alle myȝhty God, Page 145, vol.7 excellente in beawte, wolde suffre so fowle a creature to ministre abowte his precious body. And this preste commynge to this verse, "Scitote quia Dominus ipse est Deus," in the tracte of the same day, as blamynge his clerke, turnede his face to the emperour, sayenge, "Ipse fecit nos, et non ipsi nos." The emperoure seenge and herynge that made hym a bischop soone after, whiche was a man of vertuous life. Whiche bischop departede a myncheon from a ryche man, and restorede hir to her monastery, and excommunicate that ryche man with men havynge communication with hym, in that he returnede to synne ageyne with the seide myncheon. This man taryenge and contynuynge in synne, sende to the bischop, preyenge hym of absolucion; whom the bischop answerede seyenge, "If that cursed man leve that cursede woman, y assoyle hym; and if he wille not, he schalle dye afore God in this day twelf|monethe, in what houre that y dye, and ȝiffe an answere of his dedes;" and the man diede as the bischop seide, and he also." The same prince hade a pleasawnte synger in his howseholde, usynge moche the synne of the flesche; them|peroure commaundede hym to rede the gospelle in a solemne feste, but the clerke wolde not in that he hade ben pollute with Page 147, vol.7 a woman in the nyȝhte afore. Themperoure seide, "Other rede the gospelle, other departe from my londe." The clerke tayknge his goodes departed, and themperoure commaundid his men that and if he departede thei scholde folowe hym, and brynge hym ageyne to his pressonce. That doen, them|peroure seide to hym, "Y lawde and commende thy manhode that thou dredes God moore then me, and the respecte of hevyn moore then thy cuntre; þerfore refuse the synne that thow haste usede, and y schalle make the a bischop." This prince beynge in the courte of Conradus themperoure in his [folio 324a] tendre age, toke a whistille of silvyr, with whom childer have delectacion to play, from a clerke in the courte, in this con|dicion, and if he were emperour he scholde make hym a bischop. This prince made emperoure, the clerke was made a bischop. After that, within fewe dayes folowynge, them|perour was vexid soore with infirmite, insomoche that he felyd not or tastede eny thynge in thre daies. But at the laste, at the preiers of men stondynge abowte, he began to revive, and callede that bischop so promotede by hym by the cownesaile of other bischoppes to be deposede. For them|peroure seide that he was tormentede by devells with bren|nynge flammes thro the myddes of that whistelle whom the Page 149, vol.7 clerke toke to hym, in respecte of the heete of whom this fyre materialle is but as warme warm water unto scaldynge water. But a yonge man come to hym in that peyne with a peace of golde conteynynge water in hit, whiche castenge water on hym extincte that soore brennynge, whom he seide to be seynte Laurence; wherefore themperoure repairede the churche of seynte Laurence, and ȝafe a ryalle chalice of golde thyder also. Marianus. In the tyme of this emperoure there was so greet division in the churche of Rome that iij. men were electe to be pope. For a preste, Gracianus by name, was made pope for goodes that he hade ȝiffen; but this emperoure comynge to Rome to mitigate that rumor, receyvyde a crowne of the seide Gracianus; neverthelesse he was deposed in that he was con|victe of symony, and an other subrogate. In the tyme of this emperoure the body off Pallas was founde at Rome incorrupte, havynge a wounde in hit of iiij. foote and a halfe, havynge a lawnterne inextinguible at his hede, the altitude of whom excellede the altitude of the walle of the cite; and that lampe Page 151, vol.7 cowthe not be extincte with blawynge or eny moistere untyl that a subtile hoole was made with a nelde and so the aier causede hit to be extincte.