GAYUS the son of Germannicus, callede Caligula, reioycede*. [Gayus.] that name in that he was borne in the myddes of an hoste, reignenge iiij. yere and ix. monethes. This Gaius was replete with wickydnesse, commaundede hym to be callede the lorde of heuyn and of erthe. Wherefore he causede an ymage, made [folio 205a] to his similitude, to be sette in þe temple of Ierusalem; Page 365, vol.4 abusenge his sustres, puttenge theym in to exile after that abusion. This Gaius made Herodes Agrippa kynge of Iewery, putte in prison afore by Tiberius, in the firste yere of his reigne. Also he condempnede, in the secunde yere off his reigne, Herodes Antipa for inceste with Herodias his wife, to perpetualle exile, by the accusation of Herodes Agrippa; and the earth openenge deuourede the doȝhter of the seide Herodias. Then Gaius putte Pilate to exile in to Vienna of Fraunce, accusede afore hym in mony thynges, in opprobry of hys kynrede, for he was borne in those partes. For the Iewes accusede hym that he did sle innocentes, and that he putte ymages of the Gentiles in the temple ageyne theire wille, and that he made condites of water to come in to his place of the siluyr of theire holy cofre. And also that he toke the prestes stole home to his place, and wolde not suffre theyme to haue Page 367, vol.4 hit in holy daies withowte that they scholde ȝiffe a certeyne summe of money to hym. Whiche putte in to prison, hauenge a knyfe to pare an apple, did sle hym selfe þer with, whiche was caste in to Tiber with a grete weiȝhte tyede and made faste to hym. But wickede spirittes ioyenge of that pray, movede the water moche, causenge grete thundre and liȝh|tenge. Wherefore the Romanes takenge hym owte of Tiber, caste hym in to the water callede Rodanus, at Vienna, callede then the place of cursenge, and Vigenna, as a way to helle. But that place trowblede soore, the citesynnes beryede hym at Lisania. Then men dwellenge in that place, trowblede with that carion, caste that body in to a pytte compassede with hilles in a circuite, where terrible voices and sowndes be herde. Also hit is redde in the story scolasticalle, that Pilate, accusede of Page 369, vol.4 the Iewes afore Tiberius, was sende to Lugdune in Fraunce. ℞. And either story may be salvede with owte repugnaunce, understondenge that Pilate was sende to Lugdune by the accusation of the Iewes, and that he was callede from exile after the commenge of the messynger Volusian from Ierusalem, that he myȝhte haue a more grevous condempnacion. And that Pilate did sle hym selfe, Bede and Eusebius bere [folio 205b] wyttenesse.