Polychronicon Ranulphi Higden maonachi Cestrensis; together with the English translations of John Trevisa and of an unknown writer of the fifteenth century.
Higden, Ranulf, d. 1364., Trevisa, John, tr. d. 1402., Caxton, William, ca. 1422-1491., Malverne, John, d 1415?, Babington, Churchill, ed. 1821-1889,, Lumby, J. Rawson ed. (Joseph Rawson), 1831-1895.
Page  37, vol.5

Capitulum septimumdecimum.

LUCIUS COMODUS reignede after Marcus Antonius xiij. yere. This Comodus, ȝiffen to alle incommodite and luste of the flesche, causede mony senatores and Cristen men to be sleyne, [folio 220b] and causede the monethe September to be callede after his name: whiche was sleyne in the place vestalle thro the procure and cause of his wife, with so moche cursenge that he was callede the enemy of man kynde. This Lucius sende Philippe the noble citesynne of Rome to Egipte, Eugenia the doȝhter of whom departede from Philippe here fader, that tyme a gentile, with her ij. breþer Prothus and Iacinctus, in the habite of a man; whiche were baptiȝede; and after that Eugenia was made a monke, seyenge that here name was Eugenius, and Page  39, vol.5 afterwarde abbotte of the place.*. [In the margin is: "A woman abbot of a monastery."] Neverthelesse a woman fixede her siȝhte unchastely, callede Melancia, un to the abbote, whiche refusenge that synne was accusede afore the seide Philippe that he hade oppressede that woman callede Melancia. This abbotte namede Eugenius was taken and brouȝhte afore Philippe her awne fader, where sche schewede that sche was his doȝhter, with Prothus and Iacinctus her breþer. The fader seenge þat was baptiȝede with alle his howseholde, and Melancia that woman defamenge Eugenia the doȝhter of Philippe was brente sodenly with the liȝhtenge. Victor the pope succeded Eleutherius x. yere, whiche directe letters to Theophilus the bischoppe Alexandryne, and to alle the breþer þer, that thei scholde kepe a cownselle for the trewe observacion of Estur. Marianus, libro primo, capitulo tertio. For after the dethe of thapostoles un til then, men of Fraunce Page  41, vol.5 kepede the day of the nativite of Criste in the viij. kalendes of Ianuary, in what day hit happede, and Ester in the viijthe kalendes of Aprile, in what day that hit happede, after the firste tradicion. But, as the story of Eusebius rehersethe, men of the Este kepede Ester in what day the xiiij. moone of Marche happede. The pope Victor, and Narcius the patriarke of Ierusalem, were at this cownsayle, and Hireneus the bischoppe Lugdunense; where hit was ordeynede that Ester scholde be kepede in the Sonneday from the xiiij. moone of the firste monethe un to the xxjti moone inclusively. The ordinaunce of whom Theophilus Cesariense helpede moche. Theodocion the thrydde inter|pretator [folio 221a] was in þis tyme. Helius reignede after Comodus vj. monethes, whom Iulianus, a man of lawe, did sle, and so he Page  43, vol.5 entrede thempire and reignede vij. monethes, whiche was sleyne by Severus.