Old English homilies of the twelfth century : from the unique ms. B. 14. 52. in the library of Trinity College, Cambridge : Second series, with three thirteenth century hymns from ms. 54 D.4.14 in Corpus Christi College / edited, with introduction translation, and notes by the Rev. R. Morris.

XXXV. A MORAL ODE.

Ich am nu elder þan ich was a wintre and a lore. Ich wealde more þan idude mi wit oh to be more To longe ich habbe child iben a worde and a dade. Þeih ibie a winter eald to jung ich am on rade. Line 4 Vnnet lif ich habbe ilad. and ȝiet me þincheð ilade. Þan ibiðenche me þar on wel sore ime adrade. Mast al ich habbe idon ís idelnesse and chilce. Wel late ich habbe me biþoht bute me god do milce. Line 8 Fele idel word ich habbe ispeken seðen ich speken cuðe. And fele ȝeunge dade idon þe me ofðinkeð nuðe. Alto lome ich habbe igult a werke and a worde. Alto muchel ic habbe ispend to litel ileid on horde. Line 12 Mast al þat me likede ar nu hit me mislicað. Þe muchel folȝeð his iwil him selfen he biswicað. Ich mihte habben bet idon. hadde ich þo iselðe. Nu ich wolde ac ine mai for elde and for unhalðe Line 16 Elde me is bistolen on ar ich hit iwiste. Ne mai ich isien bifore me for smeche ne for miste Arȝe we beð to don god to juel al to þriste More eie stondeð man of man þan him do of criste. Line 20 Þe wel ne deð þe hwile he mai wel ofte hit sal him rewen. Þan alle men sulle ripen þat hie ar sewen. Do al to gode þat he muȝe ech þe hwile he beð aliue. Nu lipne noman to muchel to childe ne to wiue. Line 24 Þe þe him selfe forȝeit for wiue oðer for childe He sal cumen on euel stede bute him god be milde. Sende god biforen him man þe hwile he mai to heuene. For betre is on almesse biforen þan ben after seuene. Line 28

Line 28 Ne bie þe leuere þan þe self ne þi mæi ne þi mowe Sot is þe is oðer mannes frend betere þan his owen. Ne hopie wif to hire were ne were to his wiue Be for him self afric man þe hwile he beð aliue. Line 32 Wis þe him selue biðencheð þe hwile he mót libben For sone willeð him forȝiete þe fremde and þe sibbe. Þe wel ne doð þe hwile he mai ne sal he þan he wolde. For mani mannes sore iswinc habbeð ofte unholde. Line 36 Ne solde noman don a furst ne laten wel to done For mani man bihoteð wel þat hi forȝieteð sone. Þe man þe wile siker ben to habben godes blisse. Do wel him self þe hwile he mai þanne haueð hes mid iwisse. Line 40 Þe riche men weneð siker ben þurch wallen and thurh dichen. He deð his aihte an siker stede þe hit sent to heueriche. For þarf he ben of-drad of fure ne of þieue. Þar ne mai hit him binime þe loðe ne þe lieue. Line 44 Þar ne þarf he habben care of here ne of ȝielde. Þider we sendeð and ec bereð to litel and to selde. Þider we solden drawen and don wel ofte and ilome. For þar ne sal me us naht binime mid wrongwise dome. Line 48 Þider we solde ȝierne drawen wolde ȝie me ileuen. For ne mai hit us binime no king ne no syrreue. Al þat beste þat we habbeð her þider we solde sende. For þar we mihte finden eft. and habben abuten ende. Line 52 Se þe her doð ani god forto haben godes ore Al he hit sal eft finde þar and hundredfealde more. Se þe aihte wile holde wel þe hwile hes muȝe wealden. Ȝieue hes for godes luue þanne doð hes wel ihealden. Line 56 For ure swinch and ure tilðe is ofte wuned to swinde Ac al þat we ȝieueð for godes luue al we hit sulen eft finden. Ne sal þar non euel ben unboht ne god unforȝolden. Euel we doð al to muchel and god lasse þan we solden. Line 60

Line 60 Se þe mast doð nu to gode and se last to lothe. Eiðer to litel and to muchel hem sal þunche boðe. Þar me sal ure werkes weiȝen bifore þan heuen kinge And ȝieuen us ure werkes lean after ure erninge. Line 64 Africh man mid þat he haueð mai bugge heueriche Þe þe more haueð and þe þe lasse boðe iliche. Alse on mid his peni se oðer mid his punde. Þis is þet wunderlukeste ware þat ani man funde. Line 68 And se þe more ne mai don mid his gode iþanke. Alse wel se þe þe haued goldes fele manke. And ofte god can more þanc þan þe him ȝieueð lasse. Al his werkes and his weies is milce and rihtwi[s]nesse. Line 72 Litel lóc is gode lef þe cumeð of gode wille. And eðlate muchel ȝieue þan his herte is ille. Heuene and erðe he ouer sihð his eien beð ful brihte. Nis him no þing forholen swo muchel is his mihte Line 76 Ne bie hit no swo derne idon ne on swo þuster nihte. He wot hwat þencheð and hwat doð alle quike wihte Nis louerd swilch is crist ne king swilch ure drihte. Boðe ȝiemeð þe his bien bi daie and bi nihte. Line 80 Heuene and erðe and al þat is biloken is in his honden He doð al þat his wille is awatere and alonde He makeð þe fisses in þe sa þe fueles on þe lofte. He wit and wealdeð alle þing and he sop alle safte. Line 84 He is ord abuten ord and ende abuten ende. He is one afre on eche stede wende þar þu wende. He is buuen us and bineðen biforen and bihinde Þe godes wille doð aihware he maiȝ him finde Line 88 Elche rune he hereð and he wot alle dade He þurh sihð elches mannes þanc wi hwat sal us to rade. We þe brekeð godes has and gulteð swo ilome Hwat sulle we seggen oðer don ate muchele dome Line 92 We þe luueden unriht and euel lif ladden. Hwat sulle we seggen oðer don þar ængles beð ofdradde. Hwat sulle we beren us biforen mid hwan sulle we iqueme We þe nafre god ne duden þan heuenliche deme. Line 96

Line 96 Þar sulle ben deflen swo fele þat willeð us forwreien. Nabbeð hie no þing forȝieten of þat hie her iseien. Al þat hie iseien her hie willeð cuðen þare Bute we haben hit ibet þe hwile we here waren. Line 100 Al hie habbeð on here write þat we misduden here. Þeih we hes ne niseien hie waren ure iferen. Hwat sullen horlinges don þes wichen and þe forsworene Wi swo fele beð icleped swo fewe beð icorene Line 104 Wi hwi waren hie biȝiete to hwan waren hie iborene. Þe sulle ben to deaðe idemd and afremo forlorene Elch man sal þar biclepien himselfen and ec demen. Hic oȝen werc and his þanc to witnesse he sal temen. Line 108 Ne mai him noman alse wel demen ne alse rihte For non ne cnoweð hine alse wel buten one drihte. Man wot him self best his werkes and his wille. Se þe last wot he seið ofte mast se þit al wot is stille Line 112 Nis no witnesse alse muchel se mannes oȝen hierte Hwo se seið þat hie beð hol him self wot his smierte. Elch man sal him selfen demen to deaðe oðer to liue. Þe witnesse of his oȝen werc to oðer þan hine sal driue. Line 116 Al þat afri man haueð idon seðen he cam to manne Swo he hit iseie abóc iwrite he sal hit þenche þanne Ac drihte ne demeð noman after his biginninge Ac al his lif sal ben teald after his endinge Line 120 Ȝief þe endinge is god al hit is god. and euel ȝief euel is þe ende. God ȝieue þat ure ende be god and ȝieue þat he us lende. Se man þe nafre nele don god ne nafre god lif lade. Are deað and dom cumeð to his dure he maiȝ him sore adrade. Line 124 Þat he ne muȝe þanne bidden ore for þat itit ilome For þi he [is] wis þe bit and biȝiet and bet bifore dome Þanne þe deað is ate dure wel late he biddeð ore Wel late he lateð euel werc þan he hit ne mai don no more. Line 128

Line 128 Senne lat þe and þu nah him þan þu hit ne miht do no more; For-þi he is sot þe swo abit to habben godes ore. Þeih hweðere we hit leueð wel for drihte self hit sade. Elche time sal þe man of-þunche his misdade Line 132 Oðer raðer oðer later milce he sal imete. Ac þe þe her naueð ibet muchel he haued to bete Mani man seið hwo reche pine þe sal habben ende Ne bidde ich not bet bie ich alesed a domesdai of bende. Line 136 Litel wot he hwat is pine and litel he cnoweð Hwilch hit is þar sowle wunieð hwu biter wind þar bloweð. Hadde he ben þar on oðer two bare tiden. Nolde he for almidden eard þe þridde þar abiden. Line 140 Þat habbeð isaid þe come þanne þit wiste mid iwisse. Wo wurðe soreȝe seue ȝier for seue nihte blisse. And ure blisse þe ende haueð for ende-lease pine Betere is wori water þan atter imengd mid wine. Line 144 Swines brade is wel swete swo is of wilde diere. Ac al to diere he hit abuið þe ȝiefð þar-fore his swiere. Ful wombe mai lihtliche speken of hunger and of fasten Swo mai of pine þe not hwat is pine þe sal ilasten. Line 148 Hadde [he] fonded sume stunde he wolde seggen oðer Eðlate him ware wif and child suster and fader and broðer. Al he wolde oðerluker don and oðerluker þenche Þan he biðohte an helle fur þat nowiht ne mai quenche Line 152 Afre he wolde her in wo and in wane wunien Wið þan he mihte helle fur biflen and bisunien. Eðlate him ware al wele and erðeliche blisse For to þe muchele blisse cume þis murie mid iwisse. Line 156 ¶ Ich wulle nu cumen eft to þe dome ich eow ar of sade. On þe daie and on þe dome us helpe crist and rade. Þar we muȝen ben sore offerd and harde us ofdrade.

Þar elch sal al isien him biforen his word and ec his dade. Line 160 Al sal þar ben þanne cuð þat men luȝen her and halen. Al sal þar ben þanne unwrien þat men her hudden and stalen. We sullen alre manne lif icnowen alse ure oȝen Þar sullen efninges ben to þe heie and to þe loȝe. Line 164 Ne sal þeih no man samie þiar ne þarf he him adrade. Ȝief him her ofþincheð his gult and bet his misdade. For hem ne sameð ne ne grameð þe sulle ben iboreȝe Ac þoðre habbeð same and grame and oðer fele soreȝe. Line 168 Þe dom þal ben sone idon ne last hit nowiht longe Ne sal him noman mene þar of strencðe ne of wronge Þo sulle habben hardne dom þe here waren hardde Þo þe euel hielden wreche men and euel laȝe arerde. Line 172 Elch after þat he haueð idon sal þar ben þanne idemd Bliðe mai he þanne ben þe god haueð wel iquemd. Alle þo þe sprunge beð of adam and of eue Alle hie sulle þider cume for soðe we hit ileued. Line 176 Þo þe habbeð wel idon after here mihte To heueriche hie sulle fare forð mid ure drihte. Þo þe deueles werkes habeð idon and þarinne beð ifunde Hie sulle fare forð mid hem into helle grunde. Line 180 Þar hie sulle wunien abuten ore and ende. Brecð nafre eft crist helle dure for lesen hem of bende Nis no sellich þeih hem be wo and þeih hem be uneaðe Ne sal nafre eft crist þolien deað for lesen hem of deaðe. Line 184 Ænes drihten helle brac his frend he ut brohte Him self he þolede deað for hem wel diere he hes bohte. Nolde hit moȝe don for mai ne suster [for] broðer Nolde sune don for fader ne no man for oðer. Line 188 Vre alre louerd for his þralles ipined he was arode Ure bendes he unbond and bohte us mid his blode. We ȝieueð uneaðe for his luue a steche of ure breade Ne þenche we naht þar þat sal deme þe quica and þe deade. Line 192

Line 192 Muchel luue he us kedde wolde we hit understonde. Þat ure elderne misduden we habeð euel an honde. Deað cam in þis middenærd þurh ealde deueles onde And senne and soreȝe and iswinch awatere and [a] londe. Line 196 Vre foremes faderes gult we abugeð alle Al his ofsprung after him in harem is biualle Þurst and hunger. chele and hete and alle unhalðe Þurh deað cam in þis middeneard and oðer unisalðe. Line 200 Nare noman elles dead ne sic ne [non] unsele Ac mihte libbe afremo ablisse and an hale. Litel lac is gode lief þe cumeð of gode wille And eðlate muchel ȝieue þan his herte is ille Line 204 Litel hit þuncheð maniman ac muchel was þe senne For hwan alle þolieð deað þe comen of here kenne Here senne and ec ure oȝen us muȝe sore ofþunche For senne we libeð alle her in soreȝe and in swunche. Line 208 Seðen god nam swo mukel wrache for one misdede We þe swo ofte misdoð we muȝen us eaðe ofdrade. Adam and al his ofspreng for one bare senne. Was fele hundred wintre an helle a pine and unwenne. Line 212 Þo þe ladeð here lif mid unrihte and mid wronge Bute hit godes milce do hie sulle wunie þar longe. Godes wisdom is wel muchel and alsse is his mihte Ac nis his mihte nowiht lasse ac biðer ilke wihte. Line 216 More he one maiȝ forȝieue þan alle folc gulte cunne Self deuel mihte habben milce ȝief he hit bigunne. Þeþe godes milche secð iwis he mai hes finden Ac helle king is ore-leas wið þo þe he mai binden. Line 220 Se deð his wille mast he sal habbe werest mede His bað sal be wallinde pich his bed barnende glede. Werse he doð his gode wines þan his fiendes God silde alle godes friend wið swo euele friende. Line 224 Nafre an helle ine cam ne cumen ich þar ne reche Þeih ich aches woreldes wele þare mihte feche.

Þeih ich wille seggen eow þat wise men us saden And [a] boc hit is write þar me hit mai rade. Line 228 Ic wille seggen hit þo þe hit hem self nesten And warnin hem wið here unfreme ȝief hie me willeð hlesten. Vnderstondeð nu to meward eadi men and arme Ich wille tellen eow of helle pine and warnin eow wið harme. Line 232 An helle hunger and þurst euel two iferen. Þos pine þolieð þo þe ware meteniðinges here. Þar is woning and wop after ache strate Hie fareð fram hate [to] chele fram chele to hate. Line 236 [Þ]an hie beð in þe hate chele hem þuncheð blisse [Þ]an hie cumeð eft to chele of hate hie habbeð misse. [E]iðer doð hem wo inoh nabbeð [hie] none lisse. [N]iten hweðer hem doð wers to nafre none wisse. Line 240 [H]ie walkeð afre and secheð reste ac hie hes ne muȝen imeten. [F]or þi þe hie nolde þe hwile hie mihten here senne beten. [H]ie secheð reste þar non nis ac hie hies ne muȝen ifinden. [A]c walkeð weri up and dun se water doð mid winde Line 244 [Þ]at beð þo þe waren her an þanc unstedefaste. [And] þo þe gode biheten aihte and hit him ilaste. [And] þo þe god werc bigunnen and ful endin hit nolden. [N]u waren her and nu þar and nesten hwat he wolden Line 248 [Þ]ar is pich þat afre walleð þar sulle wunien inne [Þ]o þe ladeð here lif on werre and an unwinne. [Þ]ar is fur þis hundredfeald hatere þan be ure. [N]e mai hit quenche salt water ne auene stream ne sture. Line 252 [Þ]is is þat fur þat afre barneð [hit] ne mai no wiht quenche. [Þ]ar inne beð þe was to lef wreche men to swenche. Þo þe swikele men and ful of euele wrenchen.

And þo þe mihten euel don and lief hit was to þenchen. Line 256 Þe luueden rauing and stale hordom and dru[n]ken And an defles werkes bliðeliche swunken. Þo þe waren swo lease men þat mes ne mihte leuen Medȝierne domes men and wrongwise reuen. Line 260 Þo þe oðer mannes wif was lief her oȝen eðlate And þo þe sunegeden muchel on dru[n]ken and on ate. Þe wreche men binomen here aihte and leide his on horde. Þe litel lete of godes bode and of godes worde. Line 264 And þe his oȝen nolde ȝieue þar he iseih þe niede Ne nolde ihere godes men þan he sat at his biede. Þo þe was oðer mannes þing leuere þan hit solde And waren al to gradi of siluer and of golde. Line 268 Þo þe untrewnesse deden þan þe he solden ben holde. And leten al þat hie solden don and deden þat hie wolden. Þo þe waren ȝietceres of þis wereldes aihte And dude al þat þe loðe gost hem tihte to and taihte. Line 272 And al þo þe[n] ani wise deuel iquemde Þo beð mid hem in helle fordon and demde. Bute þo þe ofðuhte sore [her] here misdade And Gunne here gultes bete and betere lif lade. Line 276 Þar beð naddren and snaken eueten and fruden Þe tereð and freteð þo euele swiken þe niðfule and þe prude Nafre sunne þar ne sineð ne mone ne storre. Þar is muchel godes hete and muchel godes oerre. Line 280 Afre þar is euel smech þiesternesse and eie Nis þar nafre oder liht þan þe swarte leie. Þar ligeð ateliche fiend in stronge raketeie Þat beð þo þe waren mid god angles swiðe heie. Line 284 Þat beð ateliche fiend and Eiseliche wihten Þo sulle þe wreche sowle isien þe sinegeden þurh sihte Þar is þe loðe sathanas and belzebub se ealde Eaðe he muȝen ben sore ofdrad þe sullen hes bihealde. Line 288

Line 288 Ne mai non herte hit þenche ne tunge hit ne mai telle Hwu muchele pine ne hwu fele senden in helle Of þo pine þe þar bieð nelle ich eow naht lie Nis hit bute gamen and glie of þat man mai here drie. Line 292 And ȝiet ne doð hem naht alse wo in þe loðe bende Swo þat he witen þat here pine sal nafre habben ende Þar beð þe haðene men þe waren laȝe-lease Þe [hem] nes naht of godes bode ne of godes hease. Line 296 Euele cristene men hie beð here iferen Þo þe here cristendom euele hielden here. And ȝiet he beð awerse stede aniðer helle grunde Ne sullen [hie] nafre cumen út for peni ne for punde. Line 300 Ne mai hem noðer helpe þar ibede ne almesse For naht solden bidde þar ore ne forȝieuenesse. Silde him elch man þe hwile he mai wið þos helle pine. [And] warnie his frend þar wið swo ich habbe ido mine. Line 304 Þo þe silde hem ne cunnen ich hem wille tache [I]ch can ben aiðer ȝief isal lichame and sowle lache. Late we þat god forbet alle mankenne And do we þat he us hat and silde we us wid senne. Line 308 Luue we god mid ure herte and mid al ure mihte And ure emcristen alse us self swo us tached drihte. Al þat me radeð and singed bifore godes borde Al hit hangeð and halt bi þese twam worde Line 312 Alle godes laȝes hie fulleð þe newe and þe ealde Þe þe þos two luues halt and wile hes wel healde. Ac hie bieð wel arefeð-heald swo ofte we gulteð alle For hit is strong te stonde longe and liht hit is to falle. Line 316 Ac drihte crist ȝeue us strengðe stonde þat we moten And of alle ure gultes ȝieue us cume bote. We wilnieð after wereldes wele þe longe ne mai ilaste And legeð mast al ure swinc on þing unstedefaste. Line 320 Swunke [we] for godes luue half þat we doð for eihte. Nare we naht swo ofte bicherd ne swo euele bikeihte

Ȝief we serueden god half þat we doð for erminges We mihten habben more an heuene þa[n] ȝierles and kinges Line 324 Ne muȝe we werien naðer ne wið þurst ne wið hunger Ne wid elde ne wið elde ne wið deað þe elder ne þe ȝeunger Ac þar nis hunger ne þurst. deað ne unhalðe ne elde. Of þesse riche we þencheð to ofte of þare alto selde. Line 328 We solden biþenchen us wel ofte and ilome Hwat we beð to hwan we sullen and of hwan we come. Hwu litle hwile we bieð her hwu longe elles hware Hwat we muȝen habben her and hwat we findeð þare. Line 332 Ȝief [we] waren wise men þus we solden þenchen Bute we wurðen us iwar þis wereld us wile drenchen Mast alle men hit ȝieueð drinken of on euele senche. He sal him cunnen silde wel ȝief hit him nele screnche Line 336 Mid al mihtin godes luue úte we us biwerien [W]ið þesses wreches woreldes luue þat hit ne muȝe us derien Mid almesse. mid fasten and mid ibeden werie we us wid senne. Mid þo wapne þe god haued ȝieue alle man kenne. Line 340 [L]ate we þe brode strate and þane weg bene [Þ]e lat þe nieðe dal to helle of manne me mai wene. Go we þane narewe pað and þene wei grene [Þ]ar forð fareð wel litel folc and eche is fair and isene Line 344 [Þ]e brode strate is ure wil þe is loð te læte [Þ]o þe folȝeð here iwil hie fareð bi þare strate. Hie muȝen lihtliche cumen mid þare niðer helde [Þ]urh one godelease wude to one bare felde Line 348 [Þ]a narewe pað is godes has. þar forð fareþ wel feawe [Þ]at beð þo þe hem sildeð ȝierne wið achen unðeawe. [Þ]os goð uneaðe aȝien þe cliue and aȝien þe heie hulle [Þ]os leten al here iwil for godes luue to fulle. Line 352

Line 352 Go we alle þane wei for he us wile bringe Mid þo feawe faire men bifore þe heuen kinge [Þ]ar is alre blisse mast mid angles songe. [Þ]e is a þusend wintre þar ne þuncheð hit him naht longe. Line 356 Þe last haueð blisse he haueð sswo muchel þat he ne bit no more Þe þat blisse forgoð hit sal him rewen sore. Ne mai non euel ne non wane ben in godes riche Þeih þar ben wuniinges fele elch oðer uniliche Line 360 Sume þar habbeð lasse and sume þar habbeð more Elch after þat he dude her after þane þe [he] swanc sore Ne sal þar ben bread ne win ne oðer kennes este God one sal ben ache lif and blisse and ache reste. Line 364 Ne sal þar ben foh ne grai ne cunin ne ermine Ne aquerne ne metheschele ne beuer ne sabeline. Ne sal þer ben naðer scat ne srud ne wereldes wele none. Al þe blisse þe me us bihat al hit sal ben god one Line 368 Ne mai no blisse ben alse muchel se is godes sihte. He is soð sunne and briht and dai abute nihte. He is aches godes ful nis him no wiht uten Nones godes hem nis wane þe wunieð him abuten. Line 372 Þar is wele abuten wane and reste abuten swunche. Þe muȝen and nelleð þider cume hit hem mai ofþunche. Þar is blisse abuten treiȝe and life abuten deaðe Þo þe afre sulle wunie þar bliðe hie muȝe ben eaðe. Line 376 Þar is ȝieuð abuten elde and hale abuten unhalðe Nis þar sareȝe ne sor non ne nafre unisalðe. Þar me drihte self isien swo se is mid iwisse He one mai and sal al ben angles and manne blisse. Line 380 And þeih ne bed here eien naht alle iliche brihte Hi nabbeð naht iliche muchel alle of godes lihte On þesse liue he naren naht alle of ore mihte Ne þar ne sullen habben god alle bi one wihte. Line 384 Þo sullen more of him isien þe luueden hine more

And more ienowen and ec witen his mihte and his ore On him hie sulle finden al þat man mai to hleste On him he sullen ec isien al þat hie ar nesten. Line 388 [C]rist sal one bien inoȝh alle his derlinges. [Þ]e one is muche more and betere þan alle oðer þinges. [I]noh he haueð þe hine haueð þe alle þing wealdeð Of him to isiene nis non sæd swo fair he is to bihelden Line 392 God is swo mere and swo muchel in his godcunnesse [Þ]at al þat elles was and is is fele werse and lasse. [N]e mai hit nafre noman oðer seggen mid iwisse [H]wu muchele murihðe habbeð þo þe beð in godes blisse Line 396 [T]o þare blisse us bringe god þe rixleð abuten ende. [Þ]ane he ure sowle unbint of lichamliche bende [C]rist ȝieue us laden her swilch lif and habben her swilch ende. [Þ]at we moten þider cumen þane we henne wende. Line 400

AMEN.

Notes

• For a translation of this poem, See Old Eng. Hom. First Series, p. 158.
• So in MS.
• ?=His.
• See Old Eng. Homilies, First Series, p. 169, l. 154.
• Read sal.
• So in MS.
• So in MS.
• Read helle pine and an unwenne.
• MS. mulchel.
• Egerton MS. is; Lambert MS. ha.
• Egerton feonde.
• Lambeth MS. es.
• Read þat is.
• Read him.
• So in MS.
• Jesus MS. beoþ.
• Egerton MS. on þere; Jesus MS. anyþe.
• MS. godel.
• Egerton MS. hl.
• So in MS.
• MS. ilomo.
• So in MS.
• So in MS.
• Egerton MS. has mar|tres cheole.
• So in MS.
• Jesus MS. swete.