Hy nulleþ soþ tellen,
Þau me shulde hem quellen,
Hy ounweren here misdede.
For-þi hoe shulen in helle
Line 265
Euere gronen and swelle
And euere-mo ben þer-inne.
Wenne eni gromeþ sore,
Þe grome þuncheþ more
Þen al hore oþer pine.
Line 270
To þe(!) bi prestes lore
Nolden herien godes hore,
Þenne hoe hit shulen biwine.
At þe mounte of Olifete
Þer we ous shulen alle I-mete,
Line 275
Þe gode and þe ounwreste.
Þe day worþ milde and sete,
And bitter unimete
To hem þat forlete
To don godes heste.
Line 280
Þer comeþ god on his rode,
And his side his ablode,
And seweþ ou he ous boute.
Afered beþ þenne þe gode,
And wo is þenne þe ouermode
Line 285
Þat þer-of ne route.
"Lokeþ, seyþ god nouþe,
Wat ich for ou ouþe,
Wat ich for ou gon þolie.
Luitel þonk ȝe me couþe,
Line 290
Ne mid werke ne mid mouþe
Nolden ȝe me þonkie."
Ac he seyþ þenne to þe gode
And to his milde moder(!):
"Ȝe duden gode dede,
Line 295
Ȝe me fedden and srudden
And wel me bihedden,
Þo ich among ou hede,
And leide me a softe bedde.
Þarfore ich ou wole aredde,
Line 300
For nou ȝe habbeþ nede."
Þe gode segeþ þenne:
"Louerd, were and wenne
Duden we þe gode deden?"
"Ȝuse, he seiþ, þe poure monne,
Line 305
Þo hoe help neden nen,
Bote as hoe for me beden.
Ac ȝe, mine gode, midiwisse,
To heueriche blisse
To-day ȝe shulen wende.
Line 310
And þe acoursede to sorinesse
And to euche þesternesse,
And þer ben euere bouten ende."
He seiþ þenne to þe wrecche:
"Ȝe nolden nout hof me recche;
Line 315
For hounger ich aswal þroute,
Ȝe nolden me in fecche:
Ou-self ȝe weren so frecche,
So modi and so proude."
Hoe gredeþ þenne on heye,
Line 320
Þe wrecches and þe ounweye
Þat loueden þe ounredes,
And siggeþ: "louerd, wiþ oure eye
We þe neuere ne seye,
Þer þou nede heuedest."
Line 325
God seyþ: "ȝuse, mine
Povere, ounhole hine
Þat to oure dore come—
For chele hoe heueden pine,
Wor hounger hoe gonnen chine,
Line 330
Þerof ne nome ȝe gome,
Þer-of ȝe nolden hede
Ne ȝeuen hem of oure brede
Ne of drinke ne of cloþe.
To-day ȝe sulen frede
Line 335
And ounder-fongen mede,
For me ȝe beþ wel loþe."