Page [339]
14. Legende vom Crucifix, aus Ms. Ashmol. 61, fol. 26b.
By-twyx two knyghtys be-ȝond þe se
Fell a gret conteke to be.
By-twyx þem felle syche wreth & wo,
That þe one weyted þe oþer to slo.
This sleyne knyght hade a chyld,
Line 5
A douȝhty bachyler & wylde.
This chyld toke hym to rede
Forto venge his fader dede.
He gerte hym grete powere (&) myght,
To besege þe oþer knyght.
Line 10
The oþer knyght perseyued hym wele
And droff hym to his best castelle.
Than was he besegyd so streytly,
That he durste come oute on no party
Off all þe XII moneth, with no deseyte:
Line 15
So was he beseged streyte.
Messe ne matyns he ne herd
Ne neuer to þe chirche he ferde.
And it was in þe lentyne tyde,
When men schuld leue wreth & pride.
Line 20
Than felle it on þe gode-frydey:
The knyght þat in þe castell ley
Lukyd out & saw men go
To þe chyrche to & fro;
Barefote to þe chyrch (þei) ȝede,
Line 25
To aske mersy fore (þer) mysdede.
The knyght thouȝht: "it is longe gone
That messe at þe chirche I herd none.
What-so-euer god fore me wylle wyrche,
I wylle ryse & go to þe chyrche".
Line 30
He drew on his hose & schone, [folio 27]
And dude þe ȝatys be vndone;
Barefote he ȝede, as is þe gyse,
To chirche, to here godys seruys.
And as he þe wey to þe chirche name,
Line 35
His enmy sone aȝens hym came,
And seyd: "tratoure, now schall þou dyȝe
And my faderes deth full dere abyȝe!
No werldys gode þe schalle saue,
Bot thou þi deth of me schall haue".
Line 40
The knyght saw none oþer bote,
Bot fell on kneys before his fote
And seyd: "offe me þou haue mersy,
Fore hym þat lyȝht in þe virgyne Mary
And sofryd deth on þe rode tre
Line 45
This dey, to saue both þe & me,
And foregaffe hym þat his blode spylte:
Right so þou foregyff me þat gylte!
I ame as a presonere in þis place,
I put me now all in þi grace,
Line 50
That godys grace be on þe lente
At the dey of Jugemente".
This knyght þat was his enmy
Herd hym praye so reufolly,
And seyd: "seth þou haste me besouȝht
Line 55
Fore Jhesu loue, þat dere vs bouȝht,
And fore his moder loue so dere,
Fore them I grante þe my powere".
This Iche chyld sone doūne lyȝht
And in gode loue kyssed þe knyȝht.
Line 60
"We be now frendys, þat are wer wrothe.
Go we now to þe chyrche bothe
In gowd loue & parfyte charyte
Fore his sake þat ordeynd þus to be!"
The knyght was glade veraly,
Line 65
And so wer all þat compeny,
That he foregyffe (hym) þis mysdede.
And to þe chyrch than both þei ȝede.