now, among oure prelatis, we moven not who shulde be holde more, but which is more, uttirli, boþe to God and to þe world. And here we synnen doubli, deniyng þat we knowun not, and reversing Cristis sentence of morenesse þat he spake of. But oure goode maistir, Crist, determynede þis discencioun; and seiþ þat þer is double gretnes among men here in erþe,— gretenesse among knyȝttis, and gretenesse among clerkis. Cristis disciplis shulden not coveite gretnes of knyȝttis, but gretenes of clerkes is morenesse of mekenesse and morenesse in service, wiþouten ony booste.
And þus seiþ Crist, þat kyngis and gentilefolk have lordship of hem, and þo þat have power on hem ben clepid goode doeris. But ȝe shal not þus lyve, in noon of þes þre pointis. For worldli lordshipis shal not be among ȝou; ne power to prisoune shal be in oon upon oþir; ne ȝour goode dedis shal not stonde in ȝyvynge of worldli goodis; but he þat is more amonge ȝou be maad as ȝonger, and he þat goiþ bifore, be he as a servere. Þat is to seie, þe mekere of ȝou is more of ȝou, and oon shal go bifore anoþir, not for worldli worship, but to serve more mekeli to oþir of his felouship. And þis mai ȝe se, seiþ Crist, bi my lyf among ȝou: Wheþir holde ȝe more him þat settiþ, or him þat serveþ? Certein ȝe holde more him þat sittiþ at þe mete. But Crist is among hem as a good servere. On þe day bifore, Crist washide her feet and wipte hem wiþ a cloiþ, as þe gospel of Joon telliþ; and þanne he putte in dede soilyng of þis ques|tioun. And siþ apostlis ben þo ilke þat weren wiþ Crist whanne he was temptid, and Crist ordeynede siche meenes to aȝenstonde pryde, preestis shulden þenke on þis lore, and traveile aboute mekenes. And þis lyf is not wiþoute mede, bi witnesse of Crist. And herfore he ordeynede hem þe kingdom of hevene, as his Fadir ordeynede hym, for mekenesse þat Crist hadde. And þanne shal þei ete and drynke upon Cristis bord in his rewme; and þis is mede wiþouten eende, more þan ony worldly mede. For þanne shal þei sitte upon troones and juge kynredis of Israel; whiche kynredis ben seintis in hevene, þat shal knowe bi apostlis þat more mekenesse in þis world axiþ more hyenesse in hevene.