Page 124
ÞE FIFÞE SONDAY GOSPEL IN LENT.
[SERMON XLIV.]
Quis ex vobis arguet.—JOHN viii. [46.]
ÞIS gospel techiþ bileve by hie wordis þat Crist spake, and hou men shulden lyve þere after, and trowen in Crist and suen him. First axiþ Crist þat who of hem shal reprove him of synne; and he wolde mene þat noon myȝte. And so Crist myȝte not do synne, for ȝif he myȝte have synned, þe Jewis myȝten have reproved him of synne, as þei enforsiden many gatis, but þei traveiliden in veyn. And here we undirstonden reprofe for matere þat is trewe for cause þerof. As false peny is noo peny, so fals reprofe is no repreefe, for ech þing mut have treuþe in þat þat it haþ beyng. And in þis word Crist wolde mene þat he was boþe God and man, for ȝif he hadde not be God, he myȝte have synned as aungelis diden. And it were liȝt for to synne in veyn glory or in gabbyng, for ech gabbing is synne, and Crist gabbid, or he was God. And after þis bileve of Crist, proveþ he þat þei shulden trowe him. For siþ he seiþ but treuthe to hem, as he may noo gatis synne, þei shulden trowe unto þat treuþe, siþ þat God knowiþ al treuþe. And herfore seiþ þe word of Crist, þat ȝif he seiþ treuþe, whi trowen þei not to him. But as Crist soþely takiþ, he þat is on Goddis syde, he heeriþ Goddis wordis, or bodily or spiritualy; siþ no man may be but ȝif he heere treuþe or o tyme or oþer. And so þes hey preestis of Jewis heeren not þus Goddis wordis, for þei ben not on Goddis halfe; and þanne þei ben wiþ þe fend.
But þes Jewis conceyveden þes wordis how þei weren sharply seid to hem, and þei hadden no wey to answere ne to replie aȝens him. And herfore þei bigan to chide and accusiden Crist wiþouten cause. And two þingis þei putten on him, first þat he was a Samaritane, and [om. B, C.] siþ þat he hadde a fend, þat was felowe and helpe to him. But Crist lefte answere to þe first, and þe secounde he denyede; and so he grauntide in a manere þat he