Page 54
ÞE TWO AND TWENTIÞE SONDAI GOSPEL AFTIR TRINITE.
[SERMON XXII.]
Simile est regnum caelorum homini.—MAT. xviii. [23.]
ÞIS gospel telliþ bi a parable how bi riȝt jugement of God men shulden be merciful.—Þe kyngdom of hevene, seiþ Crist, is lyke to an erþeli kyng þat wolde ryken wiþ hise servauntis. And whanne he hadde bigun to rekoun, oon was offrid unto him þat owid him ten thousand besantis, and whan he hadde not to paye of, þe lord bad he shulde be soold, his wyf and his children and al þat he hadde, and þat þat he ouȝt þe lord shulde be algatis paid. Þis servant fell doun and praiede þe lord and seide, Have pacience in me, and Y shal quyte þee al. Þe lord hadde mercy on him, and forȝaf him al his dette. Þis servant went out and found oon of hise dettours, þat ouȝt him an hundred pens; and toke him and stranglide him, and bade him paie his dette. And þis servant felle doun and praiede him of pacience, and he shulde bi tyme ȝelde him al þat he ouȝte him. But þis man wolde not, but wente out and putte him in prisoun, til he hadde paied þe dette þat he ouȝte him. And oþir servauntis of þis man, whan þei seyen þis dede, mourneden ful myche, and tolden al þis to þe lord. And þe lord clepid him, and seide unto him, Wickide servant, al þi dette Y forȝaf þe, for þou preiedist me; ne bihoved þee not to have mercy on þi servant, as Y hadde mercy on þee? And þe lord was wroþ, and ȝaf him to turmentours, til he hadde paied al þe dette þat he ouȝte him. On þis manere, seiþ Crist, shal my Fadir of hevene do to you, but ȝif ye forȝyve, ech on to his broþir, of ȝour free herte þe trespas þat he haþ done him.
Þe kyngdom of hevene is holy Chirche, of men, þat now traveilen here; and þis Chirche bi his heed is lyke to a man kyng, for Crist, heed of þis Chirche, is boþe God and man. Þis kyng wolde ryken wiþ his servantis, for Crist haþ wille wiþouten ende to rykene wiþ men at þre tymes. First, Crist rykeneþ wiþ men whan he techiþ hem bi resoun how myche þei han hadde of him, and hou myche þei owen him; þe secounde tyme Crist