Capitulum 32m.
Ȝit þes possessioners blasphemen aȝenst þe holy gost; for þei wolen not suffre men to fulfille his wille ne his ȝiftis & saue mennus soulis bi trewe techynge of goddis hestis & poyntis of charite, [page 120] but constreynen men bi gret violence & turment to leue goddis stirynge & goddis lawe & wille vndon. For þei feynen þat men schulden not teche goddis lawe wiþ-outen here leue. And þei wolen ȝeue no leue whanne men wolen vtterly teche þe pouert & mekenesse & bisy traueile of crist & his apostlis & prechynge þe gospel, & dampnen here coueitise & pride & worldly lif & ydelnesse & ypocrisie; & þus as moche as is in hem þei distroien þe holy gost & þe holy trinyte; & 3specialy bi3 þis ypocrisie þat no man schul preche wiþ-outen here leue. for siþ þei ben ennemyes of crist & his lawe, as it is schewid bi here opyn euyl lif, & in caas deuelis of helle, þei casten þat no man schal teche trewely cristis lawe wiþ-outen leue of cristis traitour & of deuelis in helle; & so prestis ben con|streyned bi bodily peynes & deþ to leue goddis wille & precept for contrarie comaundement of goddis traitour, & in caas a deuyl in flech, as ihū crist seiþ of iudas scarioþ.