Capitulum 18m.
Also þei ben foule ypocritis & setten more prise be an oxe, hors or asse þan bi þe soule of here maistir þat costiþ mychil on hem; for ȝif þei seen vnresonable bestis of here maistris or oþere mennus fallen in a perilous lake þei wolen traueile & helpe & crien to men aboute til þe vnresonable beste be out of perils; but þouȝ here maistris [maistir X.] soule be in þe foule lake of old custumable synne, & body & soule in poynt to be dampned wiþ-oute ende, þei schullen not helpe to brynge hem out of þis peril, neiþer bi trewe conseilynge ne trewe prechynge ne stirynge of gostly frendis to þis helpe; & her-by þei schewen þat here herte is seeit to loue his muk & not is soule. but where ben falsere traitouris þan þes prestis þat wole not helpe here maistris [his maistre X.] out of þis moste peril, but raþere norische hem & conseile hem þer-inne for to haue here owene lustis & welfare.