Multyplyez on þis molde, and menske yow bytyde.
Sesounez schal yow never sese of sede ne of hervest,
Ne hete, ne no harde forst, umbre ne droȝþe,
Line 524
Ne þe swetnesse of somer, ne þe sadde wynter,
Ne þe nyȝt, ne þe day, ne þe newe ȝerez,
Bot ever renne restlez—rengnez ȝe þerinne!' [MS., M. 1 rengneȝȝe; M. 2, Sk. rengneȝ ȝe.]
Þerwyth he blessez uch a best, and bytaȝt hem þis erþe.
Line 528
Þen watz a skylly skyvalde, quen scaped alle þe wylde:
Uche fowle to þe flyȝt þat fyþerez myȝt serve,
Uche fysch to þe flod þat fynne couþe nayte,
Uche beste to þe bent þat bytes on erbez; [MS., M. 1 þat þat; M. 2, Sk. þat.]
Line 532
Wylde wormez to her won wryþez in þe erþe,
Þe fox and þe folmarde to þe fryth wyndez,
Herttes to hyȝe heþe, harez to gorstez,
And lyounez and lebardez to þe lake-ryftes;
Line 536
Hernez and havekez to þe hyȝe rochez,
Þe hole-foted fowle to þe flod hyȝez,
And uche best at a brayde þer hym best lykez.
Þe fowre frekez of þe folde fongez þe empyre.
Line 540
Lo! suche a wrakful wo for wlatsum dedez [folio 68b]
Parformed þe hyȝe Fader on folke þat he made;
Þat he chysly hade cherisched he chastysed ful hard[e], [MS., M. hardee; Sk. harde.]
In devoydynge þe vylanye þat venkquyst his þewez.
Line 544
Forþy war þe now, wyȝe þat worschyp desyres
In his comlych corte þat Kyng is of blysse,
In þe fylþe of þe flesch þat þou be founden never,
Tyl any water in þe worlde to wasche þe fayly.
Line 548
For is no segge under sunne so seme of his craftez,
If he be sulped in synne, þat syttez unclene— [M. 2 inserts ne after þat.]
On spec of a spote may spede to mysse
Of þe syȝte of þe Soverayn þat syttez so hyȝe;
Line 552